رۆحانی: رێگە نادەین وڵاتان گروپە تیرۆریستییەكان بھێننە سەر سنووری ئێران

K24 – ھەولێر:

سەرۆكی كۆماری ئیسلامی ئێران رایگەیاند، رێگە نادەن بە پاساوی شەڕی ئەرمینیا و ئازەربایجان گرووپە تیرۆریستەكان لەسەر سنووری وڵاتەكەیان جێگیر بكرێن.

ئەمڕۆ چوارشەممە، حەسەن رۆحانی، سەرۆكی كۆماری ئێران لە كۆبوونەوەی ئاسایی كابینەی دەوڵەت گوتی: چارەسەری ناكۆكییەكانی ئەرمینیا و ئازەربایجان بە گفتوگۆ دەكرێت و شەڕ دۆخەكە ئاڵۆزتر دەكات.

رۆحانی گوتیشی: ئاسایشی وڵاتەكەیان ئەولەویەتی یەكەممانە، ھەربۆیە رێگە نادەین ھیچ وڵاتێك بە پاساوی جۆراوجۆر گرووپە تیرۆریستییەكان بۆ نزیك سنوورەكانمان بھێنن.

رۆحانی ئاماژەیكرد: نابێ رێگە بدەین ئەو ناكۆكییەی كاراباخ ببێتە شەڕێكی ناوچەیی.

ھاوكات ئەمڕۆ، ئارتاگ بەگلاریان چالاكوانی مافی مرۆڤ لە قەرەباخ ئاشكرایكردووە، تا ئێستا 50%-ی دانیشتووانی ئەو ناوچەیە ئاوارە بوونە. بەگوتەی ئەو سەرچاوەیە زیاتر لە 70 ھەزار ژن و منداڵی ناوچە كوێستانییەكانی قەرەباخیش بەھۆی شەڕی ئەرمینیا و ئازەربایجان ئاوارە بوونە.