کرماشان.. سێیەم فێستیڤاڵی هەنار لە گوندی ساتیاری سەر بەر شارۆچکەی پاوە بەڕێوەچوو
لە گوندی 'ساتیاری'ـی پارێزگای کرماشان سێیەم فێستیڤاڵی هەنار، بە بەشداری هەزاران گەشتیاری ڕۆژهەڵات و باشووری کوردستان بەڕێوەچوو. بەم بۆنەیەوە، گوندەکە میوانداریی هەزاران گەشتیاری لە زۆربەی ناوچەکانی ڕۆژهەڵات و باشووری کوردستان و ئێران کرد.
کچان و کوڕان بە پۆشینی جلوبەرگی کوردی، دەفژەندن و چڕینی گۆرانیی ئایینی و کولتووری فێستیڤاڵەکەیان ڕازاندەوە.
بەڕێوبەرانی فێستیڤاڵەکە دەڵێن "ئامانجمان ئەوەیە کولتوور و مێژوو و ئایینی تایبەتیی خۆیان، بە خەڵک و وڵاتان بناسێنین و پەرە بە کەرتی گەشتیاریی ناوچەکەش بدەین."
شیلان، گەشتیارێکی دانیشتووی شیراز، بە کوردستان 24ـی گوت: زۆر حەزم لە کولتوورە جیاوازەکانی ئێرانە، ئەمجارەش کولتووری کوردەواریم هەڵبژارد و هاتووم بۆ یەکیک لە گەورەترین فێستیڤاڵی هەناری هەورامان. بە ڕای من، جلی کوردی ڕێکوپێکترین جلوبەرگی جیهانە کە جیا لە جوانییەکەی، کولتوری کوردیی دەناسێنێت.
ڕێبوار، لە هەڵەبجەوە بۆ بەشداریی لەم فێستیڤاڵە هاتووە، گوتی: هیوادارم هەمیشە ئەم کولتوورە پارێزراو و زیندوو بێت بۆ ئەوەی جیهان بە جوانیی و دەوڵەمەندیی کولتووری کورد ئاشنا بن.
بە گوتەی دانیشتوانی گوندەکە، لە کۆنەوە تاوەکوو ئێستا یەکێک لە بنکە سەرەکییەکانی بەڕێوەچوونی ئەم جەژنە گوندی ساتیاری بووە، چالاکانی گەشتیاری ناوچەکە دەڵێن؛ بەڕێوەچوونی ئەم جەژن و فیستیڤاڵانە، کەرتی گەشتیاری ناوچەکە پەرە پێ دەدات.
فەریبۆرز عەزیزی، ئەندامی لیژنەی بەڕێوبەریی فێستیڤاڵی هەنار، ڕایگەیاند " بە سازکردنی ئەم فێستیڤاڵە دەمانەوێ کولتوور و داب و نەرینی ناوچەکەمان بە ئێران و جیهان بناسێنین."
یەکەم جار 11 ساڵ بەر لە ئێستا، فێستیڤاڵی هەنار لەم گوندە بەڕێوەچووە، خەڵکی ناوچەکە بە گۆرانیی ئایینی و دەفلێدان، بۆ هاتنی وەرزی ڕنینەوەی هەنار سوپاسی خوا دەکەن و لە خوا دەپاڕێنەوە باران ببارێت.
