تراژیدیای ئاوارەیی لە ڕۆژئاڤا؛ منداڵێکی حەسەکە لە قامشلۆ ڕەق بووەوە

بەهۆی ئەو دۆخە سەختەی کە بەهۆی گەمارۆکانی سوپای عەرەبیی سووریا، بۆ سەر شار و ناوچە کوردییەکان لە ڕۆژئاوای کوردستان دروست بووە، شەش منداڵ گیانیان لە دەستداوە و بەشێکی دیکەشیان بەهۆی سەرماوسۆڵە و نەبوونی سووتەمەنی بۆ خۆگەرمکردنەوە و کەمی خۆراکەوە لە دۆخێکی سەختدان.

25ـی کانوونی دووەمی 2026، دیلان بارزان، نێردراوی کوردستان24 لە قامشلۆ گووتی: سەر لە بەیانی ئەمڕۆ ڕووداوێکی دڵتەزێن تۆمار کرا کە تێیدا منداڵێکی تەمەن 7 ساڵان بەناوی (حوسێن) بەهۆی کاریگەریی سەرمای زۆرەوە گیانی لەدەست دا.

بە گوێرەی زانیارییەکانی دیلان بارزان، ئەو منداڵە خەڵکی شاری حەسەکە بووە و خێزانەکەی بەهۆی گرژی و ئاڵۆزییەکانەوە ناچار بوون ماڵوحاڵی خۆیان جێبهێڵن و وەک ئاوارە ڕوو لە قامشلۆ بکەن، بەڵام دۆخی نالەباری ئاوارەیی و نەبوونی کەرەستەی گەرمکەرەوەی پێویست، بووە هۆی ئەوەی جەستەی حوسێن بەرگەی سەختیی ئەم زستانە نەگرێت.

ئەم ڕووداوە لە کاتێکدایە، تەنیا دوێنێ 5 منداڵی دیکە لە شاری کۆبانێ بە هەمان هۆکار گیانیان لەدەست داوە. بەمەش کۆی گشتیی ئەو منداڵانەی لە ماوەی 24 کاتژمێری ڕابردوودا لە ڕۆژئاوای کوردستان بوونەتە قوربانیی سەرما، گەیشتە 6 منداڵ.

چاودێران هۆشداری دەدەن کە ئەمساڵ زستانێکی سەخت ڕووی لە ناوچەکە کردووە، بەهۆی دابەزینی پلەکانی گەرما بۆ ژێر سفر، هەروەها گەمارۆکانی سوپای عەرەبیی سووریا بۆ سەر شار و ناوچەکانی ڕۆژئاوای کوردستان، لە لایەکی دیکە کەمیی سووتەمەنی و خۆراک، مەترسیی ڕاستەقینە لەسەر ژیانی منداڵان و بەساڵاچووان دروست بووە کە بەرگریی جەستەیان کەمترە بەرانبەر کەشوهەوای سارد.