له دێرزوور داعش هێرشیكرده سه‌ر بنكه‌یه‌كی سه‌ربازی ئه‌مه‌ریكا
چه‌كدارانی سه‌ر به رێكخراوی "داعش" هێرشیان كرده سه‌ر ده‌وروبه‌ری بنكه‌ی سه‌ربازی سوپای ئه‌مه‌ریكا له كێڵگه‌ی نه‌وتی "العمر"ی سووریا.
K24 – هه‌ولێر:
چه‌كدارانی سه‌ر به رێكخراوی "داعش" هێرشیان كرده سه‌ر ده‌وروبه‌ری بنكه‌ی سه‌ربازی سوپای ئه‌مه‌ریكا له كێڵگه‌ی نه‌وتی "العمر"ی سووریا.
روانگه‌ی سووریا بۆ مافه‌كانی مرۆڤ، كه نووسینگه‌ی سه‌ره‌كی له "له‌نده‌ن"ه و چاودێری ره‌وشی سووریا ده‌كات، بڵاویكرده‌وه، شانه‌كانی رێكخستنی "ده‌وڵه‌تی ئیسلامی" ناسراو به "داعش" له گۆڕستانی شاره‌دێی "ذیبان"ی نزیك "دێرزوور" ژماره‌یه‌ك مووشه‌ك و تۆپیان ئاراسته‌ی بنكه‌ی سه‌ربازی سوپای ئه‌مه‌ریكا له كێڵگه‌ی نه‌وتیی "العمر" كردووه.
به گوێره‌ی راگه‌یه‌ندراوی روانگه‌كه، هه‌ریه‌ك له هێزه‌كانی ئه‌مه‌ریكا و هێزه‌كانی سووریای دیموكرات به چه‌كی مامناوه‌ند و قورس، سه‌رچاوه‌ی هێرشه‌كه‌یان بۆردومان كردووه.
له خۆرهه‌ڵاتی رووباری فورات، چه‌كداره په‌ڕاگه‌نده‌بووه‌كانی داعش خۆیان رێكخستووه‌ته‌وه و رۆژانه هێرش ده‌كه‌نه سه‌ر هێزه‌كانی سووریای دیموكرات و كاروانه‌كانی سوپای ئه‌مه‌ریكا.