مارکۆ روبیۆ: ئەمریکا و ئەوروپا چارەنووسێکی هاوبەشیان هەیە
مارکۆ ڕوبیۆ، وەزیری دەرەوەی ئەمریکا، لە وتارێکی گرنگدا لە کۆنفرانسی ئاسایشی میونشن، هۆشداری دا سەبارەت بە بارودۆخی ئێستای جیهان و رایگەیاند؛ مرۆڤایەتی ئێستا رووبەڕووی ململانێیەک دەبێتەوە کە لە مێژوودا هاوشێوەی نەبووە.
روبیۆ لە میانی وتارەکەیدا ئاماژەی بە هەڕەشە نێودەوڵەتییەکان کرد و گوتی: "نەتەوەیەک هەیە خێراترین گەشەی سەربازی لە مێژووی مرۆڤایەتیدا تۆمارکردووە و هەموو تواناکانی بەگەڕخستووە، لە بەکارهێنانی هێزیش بۆ دەستەبەرکردنی بەرژەوەندییەکانی درێغی ناکات."
وەزیری دەرەوەی ئەمریکا تیشکی خستە سەر کێشە ناوخۆیی و سنوورییەکانی وڵاتەکەی و ڕەخنەی لە سیاسەتەکانی پێشوو گرت و گوتی: "ئێمە دەرگاکانمان بەڕووی شەپۆلێکی بێ وێنەی کۆچبەراندا کردۆتەوە کە مەترسی راستەقینەی لەسەر یەکێتیی کۆمەڵگاکەمان و داهاتووی گەلەکەمان دروست کردووە."
هەروەها جەختی کردەوە لەژێر سەرکردایەتی سەرۆک دۆناڵد ترەمپدا، ئەمریکا قۆناغێکی نوێی "نوێبوونەوە و چاکسازیی گشتگیر" لە ئەستۆ دەگرێت بۆ گەڕاندنەوەی پێگەی بەهێزی وڵاتەکە.
سەبارەت بە پەیوەندییە ستراتیژییەکانی نێوان واشنتن و کیشوەرە کۆنەکە، روبیۆ پەیامێکی روونی ئاراستەی سەرکردەکانی ئەوروپا کرد و رایگەیاند: "ئەمریکا و ئەوروپا پێکەوە سەر بە شارستانیەتی رۆژئاوان و چارەنووسمان هاوبەشە. ئێمە دەمانەوێت ئەوروپایەکی بەهێز ببینین، چونکە ئەمە لە بەرژەوەندی هەردوولاماندایە."
مارکۆ روبیۆ هۆشداری دا بەو لایەنانەی هەوڵی تێکدانی سەقامگیری جیهانی دەدەن و گوتی: "رێگە نادەین ئەو کەسانەی ئاشتی و سەقامگیری نێودەوڵەتی دەخەنە مەترسییەوە، یاسا نێودەوڵەتییەکان وەک پەناگەیەک بۆ خۆشاردنەوە بەکاربهێنن."