وەزارەتی دەرەوەی عێراق هۆشداریی دەدات

وەزارەتی دەرەوەی عێراق، ئەمڕۆ شەممە، 28ـی شوباتی 2026، لە راگەیەندراوێکی فەرمیدا نیگەرانی قووڵی خۆی بەرامبەر بە پەرەسەندنی دۆخی ئەمنیی لە چەند ناوچەیەکی جیهان نیشاندا و زنجیرەیەک رێنمایی بەپەلەی ئاراستەی هاووڵاتیانی عێراقی نیشتەجێی ئەو ناوچانە کرد.

وەزارەتی دەرەوە داوا لە سەرجەم ئەو هاووڵاتییە عێراقییانە دەکات لە ناوچەکانی گرژی و هێرشەکاندان، ئەوپەڕی وریایی و بئاگادار بن، جەختیشیکردووەتەوە پێویستە هاووڵاتیان بە تەواوی پابەندی رێنماییە ئەمنییەکان بن، لەلایەن لایەنە پەیوەندیدارەکانەوە دەردەچن، هەروەها رێنمایی کردوون لە شوێنە ئارامەکان بمێننەوە و بە هەموو شێوەیەک لە ناوچە مەترسیدارەکان دوور بکەونەوە.

هەر لەو چوارچێوەیەدا، وەزیری دەرەوەی عێراق سەرجەم باڵیۆزخانە و نێردە دیپلۆماسییەکانی وڵاتی لە دەرەوە راسپاردووە بە شێوەیەکی راستەوخۆ و بەرپرسانە پەیوەندی بە هاووڵاتیانی عێراقییەوە بکەن. وەزیر جەختی کردووەتەوە لەسەر پێشکەشکردنی هەموو جۆرە پاڵپشتی و هاوکارییەک بۆ هاووڵاتیان و چاودێریکردنی بەردەوامی دۆخی ژیانیان تاوەکو سەلامەتی و ئاسایشیان بە تەواوی مسۆگەر دەبێت.

وەزارەتی دەرەوە دووپاتیکردەوە، پاراستنی گیان و سەلامەتی عێراقییەکان لە دەرەوەی وڵات، ئێستا لە پێشینەی کارە هەرە گرنگەکانی وەزارەتەکەیانە و لە رێگەی هەنگاوە دیپلۆماسی و پەیوەندییە نێودەوڵەتییەکانیانەوە بەردەوام دەبن لە چاودێریکردنی وردی بارودۆخەکە.