چاودێری و گەشەپێدانی کۆمەڵایەتی هەولێر: خوێندنی ئۆنڵاین ئێمە ناگرێتەوە
بەڕێوەبەری گشتیی چاودێری و گەشەپێدانی کۆمەڵایەتی هەولێر ڕایگەیاند، بەهۆی ئەوەی قوتابییەکانمان خاوەن پێداویستی تایبەتن، قورسە بە ئۆنڵاین و دیجیتاڵی بتوانن درێژە بە خوێندن بدەین.
ئەمڕۆ چوارشەممە، 1ـی نیسانی 2026، یوسف چاوشین، بەڕێوەبەری گشتیی چاودێری و گەشەپێدانی کۆمەڵایەتی هەولێر بە ماڵپەڕی کوردستان24ـی راگەیاند، "دوای ئەوەی هەردوو وەزارەتی خوێندنی باڵا و پەروەردە بڕیاریان دا خوێندن بکرێتە دیجیتاڵی و ئۆنلاین، وەک وەزارەتی کار و کاروباری کۆمەڵایەتی لە سەر ئەم بابەتە کۆبووینەوە و بۆمان دەرکەوت ناتوانین ئەم بڕیارە لە سەر قوتابیانی سنووری وەزارەتەکەمان جێبەجێ بکەین، چونکە قوتابیانی ئێمە خاوەن پێداویستی تایبەتن و پێویستە تایبەتمەندی ئەوان لە بەر چاو بگیردرێت"
بەڕێوەبەری گشتیی چاودێری و گەشەپێدانی کۆمەڵایەتی هەولێر ئاماژەی بەوە دا، بەشێک لە قوتابیانی ئێمە نابینان، بە پلەی یەکەم پشت بە خوێندنی "بڕایڵ" دەبەستن، هەروەها قوتابی نابیست هەن کە پشت بە زمانی ئاماژە دەبەستن، جگە لەوانەش ژمارەیەک قوتابی بیرکۆڵ و داونمان هەن کە خوێندنەکەیان زۆر سەرەتاییە و فێری شتی زۆر سەرەتایی دەبن بۆیە بڕیارمان دا خوێندنەکەیان بە ئۆنلاین و بە ئامادە بوون لە نێو پۆڵ ڕابگرین چونکە دواتر دەتوانین بۆیان قەرەبوو بکەینەوە.
سەبارەت بە ئاماری قوتابیانیش، یوسف چاوشین ئاشکرای کرد کە لە پارێزگای هەولێر 160قوتابی نابیست، 70 بۆ 80 قوتابی نابینا، 105قوتابی داون و بیرکۆڵ، لە ناوەندەکانی ئەواندا دەخوێنن.
یەکشەممە، هەردوو وەزارەتی خوێندنی باڵا و پەروەردەی حکوومەتی هەرێم کۆبوونەوە بۆ بڕیار دان لەسەر دەستپێکردنەوە خوێندن و بڕیار درا خوێندن بەشێوەی دیجیتاڵی و ئۆنڵاین بەردەوام بێت.
هەروەها ئەمڕۆ دووشەممە، 30ـی ئاداری 2026، وەزارەتی خوێندنی باڵا و توێژینەوەی زانستی، بڕیاری دا پرۆسەی خوێندنی ساڵی 2025 - 2026 بە شێوازی ئۆنلاین و دیجیتاڵی تەواو بکرێت.
بۆ ئەم مەبەستە وەزارەت چەند رێکار و رێنماییەکی نوێی بۆ زانکۆ و پەیمانگەکان بڵاوکردەوە، کە لە 30/3/2026 خوێندن بەشێوەی ئۆنلاین لە سەرجەم زانکۆ و پەیمانگە حکوومی و تایبەتەکانی هەرێمی کوردستان دەست پێدەکاتەوە.
ئاماژەی بەوەشدا، دەسەڵات دراوە بە زانکۆکان کە بەپێی تایبەتمەندی بەشە زانستییەکان، یەکێک لە پلاتفۆرمە ستانداردە جیهانییەکان بۆ وانەوتنەوەی دیجیتاڵی بەکاربهێنن.
راشیگەیاند، پێویستە وانە ئۆنڵاینەکان لە چوارچێوەی کاتی دەوامی فەرمیدا بن و نابێت بخرێنە شەوان یان دوای کاتی فەرمی، هەروەها دەبێت تەواوی وانەکان بە شێوەی ئەلیکترۆنی لەسەر پلاتفۆرمەکان بەردەست بن.