بەرنامەی حکوومەتەکەی زەیدی رەوانەی پەرلەمان کرا
ئەنجوومەنی وەزیرانی عێراق بەرنامەی کاری حکوومەت بۆ چوار ساڵی داهاتوو پەسەند کرد و رەوانەی پەرلەمانی کرد.
ئەنجوومەنی وەزیرانی عێراق بە سەرۆکایەتیی عەلی زەیدی، سەرۆکوەزیرانی عێراق، لە هەنگاوێکی گرنگدا بەرنامەی گشتگیری حکوومەتی بۆ چوار ساڵی داهاتوو لە نێوان ساڵەکانی 2026 تا 2029 پەسەند کرد و بۆ بڕیاردان و دەنگدان رەوانەی پەرلەمانی کرد.
ئەم بەرنامەیە وەک نەخشەڕێگایەک بۆ تێپەڕاندنی تەنگژەکان و گۆڕانکاریی ریشەیی لە بەشەکانی دەوڵەتدا سەیر دەکرێت.
بەرنامە نوێیەکەی حکوومەت لە 139 بڕگەی سەرەکی پێکدێت و تەنیا رێکارێکی کارگێڕی نییە، بەڵکوو وەچەرخانێکی بنەڕەتییە بەرەو داهاتوو.
لە رێگەی سەردەمیانەکردنی بواری دارایی و بانکەکان و زیادکردنی قەبارەی وەبەرهێنان لە سەرچاوە سروشتییە نانەوتییەکاندا، هەروەها گواستنەوەی خێرا بەرەو سیستمی ژمارەیی و بەهێزکردنی ئاسایشی زانیارییەکان، عێراق دەیەوێت کۆتایی بە سەردەمی کورتخایەنی پشتبەستن بە داهاتی نەوت بهێنێت.
هاوکات مژدەی دامەزراندنی ئەنجوومەنی باڵای وەبەرهێنان و سەقامگیریی دارایی دەدرێت، بۆ ئەوەی دەروازەکان بە رووی سەرمایەی بیانی و ناوخۆییدا بۆ هەمیشە واڵا بکرێن.
لە رووی پاراستنی ئاسایش و سەروەرییەوە، بەرنامەکە پەیامێکی توند و گرنگە بۆ یەکپارچەیی بڕیار لە وڵاتدا. بڕیارە سەرجەم توانا چەکداری و سەربازییەکان بە تەواوی لەژێر چەتری یاسایی دەزگاکانی دەوڵەتدا یەکبخرێن، هاوکات بڕیاری سیاسیی عێراق بە سەربەخۆیی وەک هێمای یەکەمی سەروەریی دەوڵەت لە ئاستی ناوچەکە و جیهاندا بپارێزرێت.
لە قوڵایی ئەم نەخشەڕێگایەدا، لایەنە کۆمەڵایەتی و خزمەتگوزارییەکان پێگەیەکی سەرەکییان پێدراوە. دامەزراوەکانی دەوڵەت بەڵێنیانداوە سەرنجی بنەڕەتی بخەنە سەر بوارەکانی پەروەردە، تەندروستی، رێگاوبان، پەیوەندییەکان، ژێرخانی ئاو و ژینگە.
لە هەمان کاتدا حکوومەت لە روانگەیەکی مرۆییەوە، پابەندیی خۆی بۆ پاراستنی مافەکانی مرۆڤ و منداڵان و بەرەنگاربوونەوەی ریشەیی هەژاری دووپاتکردووەتەوە، ئەمەش لەگەڵ بەهێزکردنی بێپێشینەی پێگە و رۆڵی کارگێڕی و سیاسیی ژنان لە ناوەندەکانی بڕیارداندا، تاوەکوو داهاتووی عێراق لەسەر بنەمایەکی پێشکەوتوو و سەردەمیانە دابمەزرێتەوە.