دوای زیاتر لە مانگێک ئیسرائیل هێرشەکانی بۆ سەر لوبنان دەستپێکردەوە

بەهۆی هێرشێکی نوێی ئیسرائیل بۆ سەر چەند ناوچەیەکی جیاوازی باشووری لوبنان، حەوت کەس گیانیان لەدەست دا. 

بەرەبەیانیی ئەمڕۆ شەممە، 15ـی ئابی 2026، ئیسرائیل بە چڕی هێرشی کردە سەر ناوچەی "ئەنساری" لە باشووری لوبنان.

 دەزگاکانی راگەیاندنی ئەو وڵاتە بڵاویانکردەوە، هێرشەکان تەنیا ئەنساریان نەگرتووەتەوە، بەڵکوو نەبتییە و فەوقاش کراونەتە ئامانج.

تیمەکانی بەرگریی شارستانیی لوبنان کوژرانی شەش کەسیان لەو پەلامارانەدا پشتڕاست کردەوە. هاوکات روونیان کردەوە، ئاماری کوژراوان بەراییە و ئەگەری بەرزبوونەوەی ژمارەی گیانلەدەستداوان هەیە، هەروەها تیمەکانیان بەردەوامن لە گەڕان و بەهاناوەچوونی زیانلێکەوتووی هێرشەکان.

ئەمە یەکەم جارە لە ماوەی زیاتر لە یەک مانگدا، ئیسرائیل بەم شێوە چڕە پەلاماری باشووری لوبنان بدات. 

لە مانگی حوزەیرانی ساڵی 2026، بە نێوەندگیریی ئەمریکا، رێککەوتنێکی چوارچێوەیی لە نێوان ئیسرائیل و لوبنان واژۆ کرا. ئەم رێککەوتنە بە مەبەستی کۆتاییهێنان بەو شەڕە بوو لە مانگی ئاداری هەمان ساڵدا پەرەی سەند. 

ناوەڕۆکی رێککەوتنەکە داوای کشانەوەی قۆناخ بە قۆناخی هێزەکانی ئیسرائیل لە باشووری لوبنان، چەکداماڵینی حیزبوڵڵا و جێگیرکردنی سوپای لوبنان لە ناوچە تاقیکارییەکاندا دەکات. 

سەرەڕای بەڕێوەچوونی حەوت گەڕی دانوستان و بەڕێوەچوونی کۆتا گەڕیان لە سەرەتای ئەم مانگەدا لە رۆما، هێشتا رێککەوتنەکە بە تەواوی جێبەجێ نەکراوە و حیزبوڵڵاش رەتی دەکاتەوە پابەند بێت پێیەوە.

 بڕیارە لە سەرەتای مانگی ئەیلوولی داهاتوودا گەڕێکی نوێی دانوستان لە رۆما دەست پێ بکاتەوە، بەڵام بەردەوامیی پەلامارەکانی ئیسرائیل مەترسیی خستووەتە سەر هەوڵەکانی ئاشتی.