مالیکی سەرکۆنەی هێرشکردنە سەر نووسینگەی مەسرور بارزانی دەکات
سەرۆکی هاوپەیمانیی دەوڵەتی یاسا، بە توندی سەرکۆنەی هێرشەکەی دوێنێی سەر نووسینگەی سەرۆکی حکوومەتی هەرێمی کوردستانی کرد و رایگەیاند، هەر جۆرە دەستدرێژییەک کە زیان بە ئاسایشی هەرێم و سەقامگیریی عێراق بگەیەنێت، بە تەواوی رەتکراوە و قبووڵنەکراوە.
سێشەممە، 18ـی ئابی 2026، نووری مالیکی، سەرۆکی هاوپەیمانیی دەوڵەتی یاسا، لە هەژماری خۆی لە تۆڕی کۆمەڵایەتیی (ئێکس)، هەڵوێستی خۆی لەسەر هێرشەکەی دوێنێی سەر نووسینگەی مەسرور بارزانی، سەرۆکی حکوومەتی هەرێمی کوردستان راگەیاند و بە توندی سەرکۆنەی ئەو کارەی کرد.
مالیکی ئاماژەی بەوە کرد، "ئەو هێرش و دەستدرێژییەی دوێنێ کرایە سەر نووسینگەی رێزدار مەسرور بارزانی، سەرۆکی حکوومەتی هەرێمی کوردستان، کارێکی بە تەواوی رەتکراوەیە".
روونیشی کردەوە، هەر هێرشێک زیان بە ئاسایشی هەرێمی کوردستان، دامەزراوە فەرمییەکان و سەقامگیریی عێراق بگەیەنێت، بە هیچ شێوەیەک قابیلی قبووڵکردن نییە.
سەرۆکی هاوپەیمانیی دەوڵەتی یاسا جەختی لەوە کردەوە، کار و کردەوەی تێکدەرانەی لەم شێوەیە لە لایەن هەر لایەن یان گرووپێکەوە ئەنجام درابن، رەتکراوەن.
هاوکات داوای کرد کە لە رێگەی لێکۆڵینەوەی فەرمیی و بێلایەنانەوە، بە زووترین کات راستی و هۆکارەکانی رووداوەکە بۆ رای گشتی ئاشکرا بکرێن.
مالیکی داوای ئەوەشی کرد کە، ئەنجامدەرانی هێرشەکە بە پێی یاسا بەرکارەکان سزا بدرێن، بە شێوەیەک ببێتە هۆی پاراستنی ئاسایش، سەروەری و یەکپارچەیی خاکی عێراق.
ئەمەش لە کاتێکدایە بەرەبەیانیی رۆژی دووشەممە، 17ـی ئاب، دوو درۆنی بۆمبڕێژکراو لە جۆری حەدید-110 لە دیوی سنووری وڵاتی ئێرانەوە ئاراستەی بارەگای نووسینگەی تایبەتی سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە شارۆچکەی پیرمامی پارێزگای هەولێر کران.