ئەمریکا ڤیزای تەیف سامی هەڵوەشاندەوە

وەزارەتی دەرەوەی ویلایەتە یەکگرتووەکانی ئەمریکا بە فەرمی هەڵوەشاندنەوەی ڤیزای تەیف سامی، وەزیری پێشووی دارایی عێراقی راگەیاند، دوای ئەوەی ناوی خرایە ناو لیستی چاودێریی تیرۆری سەر بە دەزگای لێکۆڵینەوەی فیدراڵی (FBI).

هەینی 28ـی ئابی 2026، دیلان جۆنسن، یاریدەدەری وەزیری دەرەوەی ئەمریکا، لە راگەیەندراوێکدا ئاشکرا کرا کە واشنتن ڤیزای هاووڵاتیی عێراقی تەیف سامی محەمەد شەکارچی هەڵوەشاندووەتەوە کە پێشتر لە سەردەمی ئیدارەی بایدندا خەڵاتی پێدرابوو بۆ ئەو رۆڵەی باسی لێوە دەکرا لە رووبەڕووبوونەوەی گەندەڵی و مافەکانی ژناندا.

یاریدەدەری وەزیری دەرەوەی ئەمریکا روونیشیکردەوە ناوبراو ئێستا لەناو خاکی ویلایەتە یەکگرتووەکانی ئەمریکادا نەماوە.

ئاماژەی بەوە کرد کە لە ساڵی 2022دا، تەیف سامی لەلایەن ئانتۆنی بلینکین، وەزیری دەرەوەی پێشوو و جیل بایدن، خانمی یەکەمی پێشووی ئەمریکاوە خەڵاتی نێودەوڵەتیی ئازاترین ژنانی جیهانی پێبەخشرابوو، ئەو خەڵاتەی کە تایبەت بوو بەو ژنانەی ئازایەتی و سەرکردایەتیی بێوێنە لە داکۆکیکردن لە ئاشتی، دادپەروەری، مافی مرۆڤ و بەهێزکردنی پێگەی ژنان نیشان دەدەن.

وەزارەتی دەرەوەدا جەخت کرایەوە، هەڵوەشاندنەوەی ڤیزاکەی تەیف سامی راستەوخۆ دوای خستنەپاڵی ناوی دێت بۆ ناو لیستی چاودێریی تیرۆری دەزگای (FBI)، و دووپاتیشکرایەوە کە لە سەردەمی سەرۆکایەتیی دۆناڵد ترەمپ و مارکۆ روبیۆ، وەزیری دەرەوەی ئەمریکادا، بە هیچ جۆرێک رێگە بە مانەوەی گومانلێکراوانی تیرۆر لەناو خاکی ئەمریکادا نادرێت.

بەپێی راپۆرتەکە، چەندین یاسادانەری دیاری کۆمارییەکان لە کۆنگرێسی ئەمریکا، لەوانە جۆ ویڵسن و گرێگ ستیوبی، پێشتر تەیف سامییان بەوە تۆمەتبار کردبوو کە لە رێگەی سیستەمی دارایی و بانکیی عێراقەوە بووەتە هۆی ئاسانکاریکردن بۆ پارەدارکردنی تیرۆر لە ناوچەکەدا، و داوایان لە ئیدارەی ترەمپ کردبوو سزای توندی بەسەردا بسەپێنێت.

هاوکات لەگەڵ بڕیارەکەی واشنتن، لە ناوخۆی عێراقیشدا دەسەڵاتی دادوەری فەرمانی بانگهێشتکردنی بۆ تەیف سامی دەرکردووە و ناوی خستووەتە لیستی داواکراوانەوە لە چوارچێوەی لێکۆڵینەوە لە دۆسیەکانی گەندەڵی و بەفیڕۆدانی سامانی گشتی لە گرێبەستە حکوومییەکاندا؛ بەپێی زانیارییەکانیش، ناوبراو ئێستا لە دەرەوەی خاکی عێراق دەژی.