رێبەر ئەحمەد: قۆناخێکی گرنگ لە چاکسازیی پۆلیسی کوردستان بەڕێوەدەچێت

وەزیری ناوخۆ جەخت لە پێشخستنی تواناکان و بەدیجیتاڵکردنی دامەزراوەکان دەکاتەوە بۆ خزمەتکردنی زیاتری هاووڵاتییان.

دەستپێکی پرۆسەیەکی نوێی چاکسازی

رۆژی یەکشەممە 30ـی ئابی 2026، بە بەشداریی دەستەی راوێژکاری یەکێتیی ئەوروپا لە عێراق و هەرێمی کوردستان، وۆرکشۆپێکی گرنگ لەبارەی رابەرایەتیی ستراتیژی و چاکسازی لە پۆلیسدا دەستی پێکرد.

لە وۆرکشۆپەکەدا رێبەر ئەحمەد، وەزیری ناوخۆی حکوومەتی هەرێمی کوردستان گوتارێکی پێشکەش کرد و باسی لە وردەکارییەکانی پلانی وەزارەتەکەی کرد. 

رێبەر ئەحمەد رایگەیاند، پرۆسەی چاکسازیی پۆلیس ئاراستەیەکی زۆر گرنگە لە چوارچێوەی بەرنامەی چاکسازیی کابینەی نۆیەمی حکوومەتی هەرێمی کوردستان بە سەرپەرشتیی سەرۆکوەزیران مەسرور بارزانی، ئامانج لێی بونیادنانی دامەزراوەیەکی پۆلیسی نوێ و پیشەییە تاوەکوو بتوانێت لەگەڵ گۆڕانکارییەکانی کۆمەڵگە و ئاڵنگارییەکانی ئێستا و داهاتوودا هەنگاو بنێت. 

متمانە و خزمەتگوزاری وەک بنەمای کارکردن

لە بەشێکی دیکەی قسەکانیدا، وەزیری ناوخۆ تیشکی خستە سەر کرۆکی پرۆسەی چاکسازی و روونی کردەوە، ئامانجی کۆتایی ئەم پرۆسەیە تەنیا گۆڕینی پەیکەری کارگێڕی یان رێکارەکان نییە، بەڵکوو مەبەست لێی گۆڕانکارییەکی ریشەییە لە کواڵیتیی خزمەتگوزارییەکان و پیشەییبوونی مامەڵەی ئەفسەران. 

رێبەر ئەحمەد جەختی لەوە کردەوە، خێراکردنی جێبەجێکردنی یاسا و نزیکبوونەوە لە پێداویستییەکانی هاووڵاتییان بنەمای کارکردنی نوێی پۆلیس دەبن، هاوکات بەدەستهێنانی متمانەی گشتیی خەڵک بە هێزەکانی ناوخۆ بە کۆڵەکەی سەرەکیی سەرکەوتنی چاکسازییەکان دانا.

بەخۆماڵیکردنی ئەزموونی ئەوروپا

سەبارەت بە هەماهەنگییە نێودەوڵەتییەکان، وەزیری ناوخۆ سوپاسی دەستەی راوێژکاری یەکێتیی ئەوروپای کرد بۆ رێکخستنی ئەم گفتوگۆیە. ئاماژەی بەوە دا، ئەزموونی وڵاتانی ئەوروپا دەرفەتێکی زێڕینە بۆ دەوڵەمەندکردنی دیدگای دامەزراوەکانی هەرێمی کوردستان، بەڵام مەرجی سەرەکیی سەرکەوتنی ئەم پرۆسەیە ئەوەیە لەگەڵ دۆخی هەرێمی کوردستاندا بگونجێندرێت. 

هەروەها داوای لە سەرکردایەتیی پۆلیسی کوردستان کرد بە تەواوی خاوەندارێتیی ئەم پرۆسەیە بکەن و بەرپرسیارێتیی جێبەجێکردنی لەئەستۆ بگرن، چونکە بڕیاری سەرەکی و گۆڕانکاریی راستەقینە دەبێت لە ناوخۆی دامەزراوەکانەوە هەڵقوڵێت.

پەرەپێدانی ئەکادیمی و دیجیتاڵکردنی پۆلیس

رێبەر ئەحمەد باسی لەوە کرد، قۆناخی داهاتوو پێویستی بە پرۆگرامی پەروەردەیی نوێ هەیە لە کۆلێژەکانی پۆلیسدا، بە جۆرێک ئەم کۆلێژانە تەنیا شوێنی پێگەیاندنی ئەفسەر نەبن، بەڵکوو ببنە سەکۆیەک بۆ دروستکردنی سەرکردەی خاوەن بڕیار. 

سەبارەت بە تەکنەلۆژیاش، رایگەیاند، بەکارهێنانی سیستەمی دیجیتاڵی تەنیا ئامرازێکی نوێ نییە، بەڵکوو شێوازێکی نوێی بەڕێوەبردنە بۆ رێگریکردن لە تاوان، شەفافیەتی لێکۆڵینەوەکان و پێشکەشکردنی خزمەتگوزارییەکی پێشکەوتووتر بە هاووڵاتییان.

فراوانکردنی رۆڵی ئافرەتان لە کەرتی ئەمنیدا

لە بەشێکی دیکەی قسەکانیدا، وەزیری ناوخۆ پەیامێکی ئاراستەی سەرکردەکانی پۆلیس کرد بۆ ئەوەی بە شێوەیەکی کارا بەشداری پرۆسەکە بکەن. بەتایبەتی داوای کرد دەرفەتی زیاتر بڕەخسێندرێت بۆ بەشداریکردنی ئافرەتان لە ریزەکانی پۆلیس و سەرکردایەتیکردندا. 

وەزیری ناوخۆ دووپاتی کردەوە، کۆمەڵگە بە هەموو پێکهاتەکانییەوە کاتێک هەست بە ئارامی دەکات وا هەست بکات نوێنەرایەتییەکی تەواوی لە نێو هێزەکانی پۆلیسدا هەیە، بۆیە هاندانی ئافرەتان و متمانەپێدانیان بەشێکی دانەبڕاوە لە ستراتیژیی نوێی وەزارەتی ناوخۆ بۆ بونیادنانی پۆلیسێکی بەهێز و سەردەمیانە.