سەرۆک بارزانی: خوالێخۆشبوو عەبدولواحید بارزانی نموونەی دینداری و چاکەخوازی بوو

سەرۆک بارزانی کۆچی دواییی برا گەورەی بنەماڵەکەیانی (عەبدولواحید ئیبراهیم شێخ عەبدولسەلام بارزانی) بەهۆی نەخۆشییەوە راگەیاند.

دەقی پەیامی سەرۆک بارزانی

بەناوی خودای مەزن و دلۆڤان

وَبَشِّرِ الصَّابِرِينَ الَّذِينَ إِذَا أَصَابَتْهُم مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ

جەماوەری بەڕێز و خەڵکی خۆشەویستی کوردستان

بە دڵێکی پڕ لە پەژارە و رەزامەند بە قەدەری خوای گەورە رایدەگەیێنین کە برا گەورەی بنەماڵەکەمان، خوالێخۆشبوو عەبدولواحید ئیبراهیم شێخ عەبدولسەلام بارزانی ئەمڕۆ هەینی (4ـی ئەیلوولی 2026) بەهۆی نەخۆشییەوە  کۆچی دوایی کرد.

خوالێخۆشبوو، نەوەی رێبەری نیشتمانی و ئایینی، شێخ عەبدولسەلام بارزانی بوو؛ نموونەی دینداری و خوداپەرستی و چاكەخوازی و لە هەمانكاتدا کەسایەتیەکی دیار و گەورەی ناو بنەماڵەکەمان بوو.

لەخودای گەورە داواکارین، رۆحی پاکی خوالێخۆشبوو بخاتە بەر سێبەری رەحمەتی خۆی و بە بەهەشتی بەرین شاد بکات.

إِنَّا لِلَّهِ وَإِنَّا إِلَيْهِ رَاجِعُونَ

مسعود بارزانی
4ی ئەیلوولی 2026