ئایدن مەعروف: هەولێر لانکەی هەمەڕەنگی و پێکەوەژیانی سەرجەم پێکهاتەکانە
وەزیری هەرێم بۆ کاروباری پێکهاتەکان لە راگەیەندراوێکدا جەختی کردەوە، هەولێر بە درێژایی مێژوو وەک قەڵایەکی پۆڵایین بۆ برایەتی، لێبوردەیی و پێکەوەژیانی ئاشتییانەی نێوان سەرجەم پێکهاتە نەتەوەیی و ئایینییەکان ناسراوە.
ئەمڕۆ یەکشەممە، 6ـی ئەیلوولی 2026، ئایدن مەعروف، وەزیری هەرێم بۆ کاروباری پێکهاتەکان ئەم دۆخەی بە جێی شانازییەکی گەورە بۆ هەرێمی کوردستان دانا و روونیکردەوە، لە هەولێر سەرجەم پێکهاتەکان لەژێر چەتری پێکەوەبووندا بە رێز و هاوئاهەنگیی تەواوەوە شانبەشانی یەکدی دەژین.
وەزیری هەرێم بۆ کاروباری پێکهاتەکان روونیکردەوە، ئەم فرەڕەنگی و هەمەڕەنگییە، نەک هەر خاڵی جیاکاری نییە، بەڵکو گەورەترین سەرچاوەی هێز، دەوڵەمەندی و جوانیی کۆمەڵگەی کوردستانە. لەم سۆنگەیەوە، جەختی لەوە کردەوە کە پاراستن و قووڵکردنەوەی ئەم کولتوورە جوانەی پێکەوەژیان بەردەوام دەبێت.
لە کۆتایی راگەیەندراوەکەدا، ئایدن مەعروف سوپاس و پێزانینی خۆی ئاراستەی پێکهاتە رەسەنەکانی هەولێر و سەرجەم هاووڵاتییان کرد کە هەمیشە ئارامی و جوانیی شارەکەیان پاراستووە. وەزیری هەرێم داوای لە هەموو لایەک کرد پێکەوە پارێزەری ئەم کولتوورە مەزنە بن و ئایندەیەکی گەشتر بۆ نەوەکان بنیاد بنێن.