رێژەی جەماوەریی ترەمپ لەناو سپیپێستەکان کەمی کردووە

بەپێی نوێترین راپرسییەکان، رێژەی رەزامەندی لە کارەکانی دۆناڵد ترەمپ، سەرۆکی ئەمریکا لەناو دەنگدەرە سپیپێستەکاندا، کە ناوەندی سەرەکیی لایەنگرانی ئەو پێکدەهێنن، لە سەرەتای هاوینەوە بە شێوەیەکی بەرچاو دابەزیوە، ئەمەش نیگەرانیی لای کۆمارییەکان بۆ هەڵبژاردنەکانی ناوەڕاستی خول دروست کردووە.

بەپێی راپرسییەکی دامەزراوەی "ActiVote"، رێژەی رەزامەندی سپیپێستەکان لە کارەکانی ترەمپ لە مانگی حوزەیراندا 47% بووە، بەڵام لە مانگی تەممووزدا بۆ 39% دابەزیوە. هەرچەندە لە مانگی ئابدا کەمێک بەرزبوونەوەی بەخۆوە بینیوە و گەیشتووەتە 40%، بەڵام بە گشتی لە وەرزی هاویندا رێژەی پشتگیریی سپیپێستەکان بۆ ترەمپ 7 خاڵ دابەزیوە.

راپرسییەکانی دیکەش هەمان ئاراستە پێشان دەدەن. بەپێی راپرسییەکی "The Economist/YouGov" کە لە نێوان 28 بۆ 31ی ئاب ئەنجام دراوە، تەنیا 36%ی ئەمریکییەکان لە کارەکانی ترەمپ رازین، لە بەرامبەردا 60%یان ناڕەزایەتییان دەربڕیوە. ئەم دابەزینە بە تایبەت لەناو ئەو سپیپێستانەی بڕوانامەی زانکۆیان نییە زیاتر دیارە، کە پێشتر یەکێک بوون لە گرووپە هەرە بەهێزەکانی پشتگیری ترەمپ.

شارەزایانی سیاسی هۆکاری ئەم دابەزینە بۆ نیگەرانییەکانی خەڵک لەبارەی دۆخی ئابووری و شەڕی ئێران دەگەڕێننەوە. راپرسییەکی زانکۆی کوینیپیاک دەریخستووە کە 60%ی دەنگدەران دژی هێرشی سەربازی ئەمریکان بۆ سەر ئێران، هەروەها 49%ی بەشداربووان دەڵێن بارودۆخی دارایییان بەراورد بە ساڵی رابردوو خراپتر بووە.

دی ستیفن ڤۆس، پرۆفیسۆری زانستە سیاسییەکان لە زانکۆی کێنتاکی، رایگەیاندووە کە ئەم پاشەکشەیەی ترەمپ دەبێتە گرفت بۆ کاندیدانی پارتی کۆماری، بە تایبەت لەو ناوچانەی کە ساڵانێکی زۆرە وەک قەڵای کۆمارییەکان دەناسرێن. ئاماژەی بەوەش کرد، ئەگەر ئەم دابەزینە لە ناوچە گوندنشینەکان و لەناو سپیپێستە بێ بڕوانامەکان بەردەوام بێت، کۆمارییەکان رووبەڕووی شکستێکی گەورە دەبنەوە.

لەگەڵ ئەمانەشدا، دۆناڵد ترەمپ هێشتا لەناو لایەنگرانی پارتەکەیدا خاوەن پێگەیەکی بەهێزە. راپرسییەکان دەریدەخەن کە 80% بۆ 86%ی کۆمارییەکان هێشتا پشتگیری لێ دەکەن، ئەم رێژەیەش لەناو لایەنگرانی "MAGA" دەگاتە 95%.