ترەمپ پێشنیازی ناوێکی نوێ بۆ نیو مەکسیکۆ دەکات
دۆناڵد ترەمپ، سەرۆکی ئەمریکا پێشنیازی گۆڕینی ناوی ویلایەتی نیومەکسیکۆی بۆ "نیوئەمریکا" خستە روو و رایگەیاند، چەندین کەس ئەو ناوەیان پێشنیار کردووە.
ترەمپ لە تروس سۆشیاڵ نووسیویەتی: "زۆر کەس پێشنیازی گۆڕینی ناوی نیومەکسیکۆ بۆ نیوئەمریکایان کردووە". سەرۆکی ئەمریکا سەرسامیی خۆی بەو بیرۆکەیە دەربڕی.
ترەمپ ناوی پێشنیازکراوی بە ناوێک وەسف کرد کە بۆ دانیشتووانی ویلایەتەکە شکۆدارتر و جوانتر دەبێت. لەبارەی نیومەکسیکۆوە گوتی: "بیرۆکەیەکی چەندە نایابە، حەزم لێیەتی".
لە هەمان پۆستدا، ترەمپ تۆمەتەکانی سەبارەت بە هەڵبژاردنەکانی ئەو ویلایەتە دووبارە کردەوە. بەگوێرەی قسەکانی، نیومەکسیکۆ یەکێکە لەو ویلایەتانەی شایەدی ساختەی بەرفراوانی هەڵبژاردن بووە.
ترەمپ لە پۆستەکەیدا هیچ بەڵگەیەکی بۆ پشتگیریکردنی ئەو تۆمەتە نەخستە روو. هەروەها روونی نەکردەوە ئاخۆ قسەکانی سەبارەت بە گۆڕینی ناوی ویلایەتەکە، پێشنیازێکی فەرمییە ئیدارەکەی کاری لەسەر بکات، یان تەنیا پشتگیریکردنی بیرۆکەیەک بووە کە بە گوتەی خۆی، کەسانی دیکە خستوویانەتە روو.
ئەم پێشنیازەی ترەمپ لە کاتێکدایە پێشتر پێشنیازی هاوشێوەی سەبارەت بە ناوی شوێنە جوگرافییەکان کردبوو، لەوانە بەکارهێنانی ناوی "کەنداوی ئەمریکا" لەجیاتی کەنداوی مەکسیک لە بەکارهێنانە فەرمییەکانی ئەمریکا.
هەروەها ترەمپ بەم دواییانە ناوەڕۆکێکی بڵاو کردەوە، ئاماژە بە ناونانی دەریاچەی ئۆنتاریۆ دەکات، کە دەکەوێتە نێوان ئەمریکا و کەنەدا، بە "دەریاچەی ئەمریکا".
گۆڕینی ناوی ویلایەتێکی ئەمریکا لە گۆڕینی ناوی شوێنێکی جوگرافی جیاوازە، چونکە ناوی نیومەکسیکۆ لە دەستووری ویلایەتەکە و لە یاسا و دامەزراوە حکوومییە پەیوەندیدارەکاندا جێگیر کراوە. ترەمپ لە پۆستەکەیدا هیچ هەنگاوێکی یاسایی بۆ دەستپێکردنی گۆڕینی ناوەکە بۆ "نیوئەمریکا" رای نەگەیاندووە.