کۆبوونەوەی شاندی باڵای هەرێم و وەزارەتی دارایی عێراق دەستیپێکرد

ئەمڕۆ چوارشەممە، 7ـی تشرینی یەکەمی 2026، پەیامنێری کوردستان24 لە بەغدا رایگەیاند، کۆبوونەوەی شاندی باڵای حکوومەتی هەرێمی کوردستان و وەزارەتی دارایی عێراق بەسەرپەرشتی فالح ساری بۆ گفتوگۆکردن لەسەر پشکی هەرێم دەستیپێکرد.

لە چوارچێوەی هەوڵەکان بۆ رێکخستنەوەی پەیوەندییە داراییەکانی نێوان هەولێر و بەغدا، شاندێکی باڵای دانوستانکاری حکوومەتی هەرێمی کوردستان سەردانی بەغدایان کرد، ئامانجی سەرەکیی سەردانەکە، گەیشتنە بە رێککەوتنێکی روون و کۆتایی لەسەر پشکی هەرێم لە یاسای بودجەی فیدراڵیی ساڵی 2027 و دوورخستنەوەی مووچەی هاووڵاتییان لە ململانێ سیاسییەکان.

 شاندی دانوستانکاری هەرێم فرەلایەنە و نوێنەرایەتیی سەرجەم جومگە گرنگەکان دەکات، کە بریتین لە:

سەرۆکی دیوان و سکرتێری ئەنجوومەنی وەزیران.
سەرۆکی فەرمانگەی هەماهەنگی و بەدواداچوون.
بریکاری وەزارەتی سامانە سروشتییەکان.
بەڕێوەبەرانی گشتیی بودجە و ژمێریاری لە وەزارەتی دارایی هەرێم.
نوێنەری وەزارەتی کاروباری پێشمەرگە.
بەشداریکردنی نوێنەرانی نەوت، دارایی و پێشمەرگە بە یەکەوە، نیشانی دەدات کە هەرێم دەیەوێت سەرجەم دۆسیە هەڵپەسێردراوەکان بە یەک پاکێج لەگەڵ وەزارەتی دارایی فیدراڵی یەکلا بکاتەوە.

شاندەکەی هەرێمی کوردستان بە هەماهەنگی لەگەڵ نوێنەرە کوردستانییەکان لە بەغدا، چەند داواکاری و ئامانجێکی ستراتیژییان پێیە بۆ جێگیرکردن لە بودجەی 2027، گرنگترینیان:

جیاکردنەوەی مووچە لە خەرجییە فیعلییەکان: خاڵی هەرە گرنگی سەردانەکە، هەوڵدانە بۆ دابڕاندنی مووچە و بژێویی بنەڕەتیی خەڵک لە پێوەری "خەرجییە راستەقینەکان" (الإنفاق الفعلي). هەرێم داوا دەکات مووچە بەدوور بێت لە هەر کۆتوبەندێک کە ببێتە هۆی دواخستن یان کەمکردنەوەی.

سەلماندنی پابەندییەکان: شاندەکە بە داتاوە ئەوە دەخاتە روو کە هەولێر سەرجەم پابەندییە دارایی و نەوتییەکانی جێبەجێ کردووە، بۆیە بۆ ساڵی 2027 نابێت بەغدا هیچ بەهانەیەک بهێنێتەوە بۆ راگرتنی شایستەکانی هەرێم.

هاوتاکردنی مافەکان بەپێی دەستوور: بە پشتبەستن بە بڕیارەکانی دادگای باڵای فیدراڵی، هەرێم پێداگری دەکات کە دەبێت فەرمانبەران، پێشمەرگە، هێزەکانی ناوخۆ، خانەنشینان، زیندانییانی سیاسی و سوودمەندانی چاودێریی کۆمەڵایەتی لە هەرێمی کوردستان، بە تەواوی ماف و ئیمتیازاتەکانیان هاوتای ناوچەکانی دیکەی عێراق بێت.

میلاکات و پڕۆژەکانی وەبەرهێنان: جگە لە مووچە، گفتوگۆیەکی ورد دەکرێت لەسەر پەسەندکردنی خشتەی میلاکات، پلەبەرزکردنەوەی فەرمانبەران (الترفیعات)، خەرجییە بەکاربەرەکان، و پشکی هەرێم لە پڕۆژەکانی وەبەرهێنان و خەرجییە حاکیمە و سەروەرییەکان.

ئەم سەردانە تەنها بۆ چارەسەرکردنی کێشەیەکی کاتی نییە، بەڵکو حکوومەتی هەرێم دەیەوێت "میکانیزمێکی روون، یاسایی و هەمیشەیی" لە نێو دەقی یاسای بودجەی 2027دا جێگیر بکات. ئامانجەکە ئەوەیە کە پرۆسەی ناردنی پارە و شایستە داراییەکانی هەرێم ئۆتۆماتیکی بێت و ساڵانە پێویستی بە شاندی نوێ و گفتوگۆی دوورودرێژ نەبێت.