کۆریای باشوور باڵیۆزی لە ئۆکرانیا کشاندەوە

ئەمڕۆ شەممە، 10ـی تشرینی یەکەمی 2026، وەزارەتی دەرەوەی کۆریای باشوور رایگەیاند، بارک کی-تشانغ، باڵیۆزی وڵاتەکە لە ئۆکرانیا گەڕاوەتەوە سیئۆل. 

پێنجشەممەی رابردوو، سیئۆل باڵیۆزەکەی لە ئۆکرانیا بانگهێشت کردەوە. ئەمەش بەهۆی ئەوەی مانگی رابردوو ڤۆلۆدیمیر زێلینسکی، سەرۆکی ئۆکرانیا لەبەردەم کۆمەڵی گشتیی نەتەوە یەکگرتووەکان ئاشکرایکرد، وڵاتەکەی دوو سەربازی کۆریای باکووری رادەستی کۆریای باشوور کردووە، کە لە جەنگی رووسیا بە دیل گیرابوون.

ئەم ئاشکراکردنە تووڕەیی بەرپرسانی سیئۆلی لێکەوتەوە، چونکە پێیانوایە زێلینسکی رێککەوتنێکی نهێنیهێشتنەوەی ئەو بابەتەی پێشێلکردووە. کۆریای باشوور نیگەرانە لەوەی بڵاوکردنەوەی ئەو زانیارییانە خێزانی دیلەکان بخاتە مەترسییەوە.

لە کاردانەوەی ئەو رووداوەدا، سیئۆل باڵیۆزی ئۆکرانیای بانگهێشت کرد و هەڕەشەی گرتنەبەری رێوشوێنی زیاتری کرد، بەبێ ئەوەی سروشتی رێوشوێنەکان دیاری بکات. لی جای میۆنگ، سەرۆکی پارتەکە داوای لێبوردنێکی فەرمیی لە ئۆکرانیا کرد.

گەڕانەوەی باڵیۆزی کۆریای باشوور هاوکاتە لەگەڵ ئەو زانیارییانەی ئەم هەفتەیە رۆژنامەی گاردیان بڵاویکردەوە، کە باس لە ناردنی 176 هەزار تۆن بەرهەم، بەشێوەیەکی سەرەکی گاز، لە کۆریای باشوورەوە بۆ رووسیا لە مانگەکانی تەممووز و ئاب دەکات، بابەتێک کە کیێڤ رەخنەی لێگرتووە.

لە کیێڤ، گوتەبێژی وەزارەتی دەرەوەی ئۆکرانیا بە رۆژنامەنووسانی راگەیاند: "دڵنیاین دیپلۆماسی دەبێت بەسەر سۆزدا زاڵ بێت." گوتەبێژەکە هیوای خواست دیالۆگێکی بنیاتنەر لەگەڵ سیئۆل دەست پێ بکەنەوە.