بەهۆی نقومبوونی بەلەمێک زیاتر لە 100 کۆچبەر گیانیان لەدەستدا
رێکخراوی نێودەوڵەتی کۆچ رایگەیاند، بەهۆی نقوومبوونی بەلەمێک لە کەناراوەکانی جیبوتی لە شەوی پێنجشەممە، لانیکەم 109 کۆچبەر گیانیان لەدەستداوە، کە 15 منداڵیان لەنێودایە و نزیکەی 116 کەسی دیکەش بێسەروشوێن بوون.
ئەمڕۆ یەکشەممە، 11ـی تشرینی یەکەمی 2026، رێکخراوەکە لە راگەیەندراوێکدا و بە پشتبەستن بە گێڕانەوەی رزگاربووان، ئاشکرایکرد، بەلەمەکە هەڵگری 350 کۆچبەر بووە و لە جیبوتییەوە بەرەو یەمەن بەڕێکەوتبوو، پێش ئەوەی لە باکووری کەناراوەکانی ئۆبوک نقووم ببێت. تیمەکانی رێکخراوەکە لەسەر زەوی هاوکاری بەرپرسانی خۆجێیی دەکەن بۆ پێشکەشکردنی فریاگوزارییەکان.
ئەلێکساندەر کواساك، سەرۆکی تیمی رێکخراوەکە لە جیبوتی گوتی "ئەمە زیانێکی ترسناکە لە گیانی مرۆڤەکان. دڵمان لەگەڵ رزگاربووان و ئەو خێزانانەیە کە ئازیزانیان لەدەستداوە یان هێشتا چارەنووسی کەسوکاریان نازانن".
کواساك روونیکردەوە، ئەم کارەساتە وەبیرهێنانەوەیەکی روونی ئەو مەترسییانەیە کە کۆچبەران لەم رێگەیەدا رووبەڕووی دەبنەوە لە پێناو بەدەستهێنانی هەلی ئابووری. هەوڵەکان بۆ بڕینی گەرووی بابولمەندەب بە ئامانجی گەیشتن بە یەمەن، رۆژ بە رۆژ مەترسییەکانی بۆ سەر ژیانی کۆچبەران زیاتر کردووە.
ئامارەکانی رێکخراوەکە دەریدەخەن، ئەو 109 تەرمەی دۆزراونەتەوە بریتین لە 52 پیاو، 42 ئافرەت و 15 منداڵ، کە 9 کچ و 6 کوڕیان لەنێودایە. زیاتر لە 80 کەسیش لەو رووداوە رزگاریان بووە، کە سەرجەمیان هاووڵاتیی ئەسیوپین.
رێکخراوی نێودەوڵەتی کۆچ جەختیدەکاتەوە، هەژاری و نەبوونی ئاسایش و دەرهاویشتە پەرەسەندووەکانی گۆڕانی کەشوهەوا کۆچبەران ناچار دەکەن ئەم گەشتە مەترسیدارە بکەن، سەرەڕای ئەوەی ئاڵۆزییەکان لە سەرانسەری رۆژهەڵاتی ناوەڕاست لە زیادبووندان.