بارەگای بارزانی: دیداری مێری هیچ پەیوەندییەکی بە ئێمەوە نییە
بارەگای بارزانی، رەخنەی لە شێوازی بەڕێوەچوونی "دیداری مێری 2026" گرت و رایگەیاند: جێگەی داخە کە ئەم کۆڕبەندە ئەمساڵ نەیتوانیوە بە شایستەیی لە بانگهێشتکردنی میوانان و پەنێڵەکانیدا رەچاوی فرەلایەنیی سیاسی و بەشداریی لایەنە سیاسییەکانی بەشەکانی دیکەی کوردستان بکات.
سێشەممە، 13ـی تشرینی یەکەمی 2026، بارەگای بارزانی، راگەیەنراوێکی سەبارەت بە بەڕێوەچوونی "دیداری مێری 2026" لە شاری هەولێر بڵاو کردەوە و تێیدا رەخنەی لە شێوازی رێکخستنی کۆڕبەندەکە گرت.
لە راگەیەنراوەکەدا هاتووە، جێگەی داخە کە ئەم کۆڕبەندە ئەمساڵ نەیتوانیوە بە شایستەیی لە بانگهێشتکردنی میوانان و رێکخستنی پانێڵەکانیدا رەچاوی فرەلایەنیی سیاسی و بەشداریی لایەنە سیاسییەکانی بەشەکانی دیکەی کوردستان بکات.
لە راگەیەنراوەکەدا جەخت لەوە کراوەتەوە، لە دیدارێکی ئاوا گرنگدا، پێویست بوو نوێنەرایەتیی دۆزی گەلی کورد لە بەشەکانی دیکەی کوردستان بە شێوەیەکی فراوان و بە بەشداریی سەرجەم لایەنەکان رەنگ بداتەوە.
بارەگای بارزانی لە بەشێکی دیکەی راگەیەنراوەکەدا هۆشداریی داوە و دەڵێت: ئەم جۆرە مامەڵەکردنە نیگەرانیی خەڵکی تێکۆشەر و رەسەنی بەشەکانی دیکەی کوردستانی لێکەوتووەتەوە و دەبێتە هۆی قووڵکردنەوەی پەرتەوازەیی و دووبەرەکی لە نێوان رۆڵەکانی گەلی کوردستاندا.
بارەگای بارزانی هەڵوێستی کۆتایی و یەکلاکەرەوەی خۆی ئاشکرا کردووە و رایگەیاندووە، "هەموو لایەک ئاگادار دەکەینەوە کە دیداری مێری 2026 هیچ پەیوەندییەکی بە ئێمەوە نییە".