وەزارەتی کارەبا: سبەی دوا دەرفەتە بۆ داشکاندنی قەرزەکانی پێش پڕۆژەی رووناکی

وەزارەتی کارەبای هەرێمی کوردستان رایگەیاند: سبەی دوایین مۆڵەتە بۆ سوودمەندبوون لە بڕیاری داشکاندنی پێش دەستپێکردنی پڕۆژەی رووناکی. هاوکات دەرگای سەرجەم فەرمانگەکانی فرۆشتنی وزە لە بەیانییەوە تا ئێوارە بە رووی هاووڵاتییاندا کراوە دەبن.

وەزارەتی کارەبای حکوومەتی هەرێمی کوردستان، لە ڕاگەیەنراوێکی بە پەلەدا سەرجەم هاوبەشانی تۆڕی کارەبای ئاگادار کردەوە کە سبەی ڕۆژی یەکشەممە، 18ـی تشرینی یەکەم 2026، دوا مۆڵەتە بۆ سوودمەندبوون لە بڕیاری داشکاندنی بە رێژەی 50% بۆ قەرزی کۆنی کارەبای ماڵان و بە رێژەی 25% بۆ پۆلی بازرگانی کە مێژووەکەی بۆ پێش دەستپێکردنی پڕۆژەی رووناکی دەگەڕێتەوە.

بە پێی ڕاگەیەنراوەکەی وەزارەتی کارەبا، بە مەبەستی دەستەبەرکردنی کارئاسانیی تەواو بۆ هاووڵاتییان، سەرجەم فەرمانگەکانی فرۆشتنی وزە لە سەرتاسەری پارێزگا و ئیدارە سەربەخۆکانی هەرێمی کوردستان، سبەی یەکشەممە لە کاتژمێر 8:30ـی بەیانی تاوەکو درەنگانی ئێوارە بەردەوام دەبن لە دەوامی فەرمی و دەرگاکانیان واڵا دەبێت تا ئەو کاتەی هاوبەشێک لە هۆڵەکاندا مابێت.

وەزارەتی کارەبا ئاماژەی بەوەش کردووە، کە جگە لە سەردانی مەیدانی بۆ فەرمانگەکان، هاوبەشانی کارەبا دەتوانن لە ڕێگەی سیستەمی ئەلیکترۆنیی (ئی-پسوولە)ـوە تاوەکو کاتژمێر 12ـی شەو، لە ماڵەکانی خۆیانەوە و بە شێوازی ئۆنلاین قەرزی کارەباکانیان بە رێژەی داشکاندنەکەوە بدەنەوە.

وەزارەتی کارەبا دووپاتی کردەوە کە لە دوای تەواوبوونی ئەم وادەیە، هیچ داشکاندنێک نامێنێت و سەرجەم قەرزە کۆنەکانی پێش پڕۆژەی رووناکی بە شێوەیەکی ئۆتۆماتیکی دەکرێنە قیستی مانگانە و هاوشانی کرێی کارەبای بەکارهاتووی مانگانە لە هاوبەشان وەردەگیرێتەوە.