فوئاد حوسێن و عێراقچی پرسی ئاشتی و پێشهاتەکانی ناوچەکەیان تاوتوێ کرد
لە پەراوێزی کارەکانی خولی 52ـەمی ئەنجوومەنی وەزیرانی دەرەوەی رێکخراوی هاوکاریی ئیسلامی لە بەغدا، وەزیری دەرەوەی عێراق لەگەڵ عەباس عێراقچی، هاوتا ئێرانییەکەی کۆبووەوە؛ لە دیدارەکەدا فوئاد حوسێن جەختی لە هەڵوێستی نەگۆڕی عێراق کردەوە بۆ چارەسەری ئاشتییانەی قەیرانەکان لە رێگەی دیالۆگ و دیپلۆماسییەوە.
یەکشەممە 18ـی تشرینی یەکەمی 2026، فوئاد حوسێن، وەزیری دەرەوەی عێراق لە پەیامێکدا لە هەژماری فەرمیی خۆی لە تۆڕی کۆمەڵایەتیی ئێکس، رایگەیاند، لە پەراوێزی کارەکانی کۆبوونەوەی وەزیرانی دەرەوەی رێکخراوی هاوکاریی ئیسلامی لە بەغدا، لەگەڵ عەباس عێراقچی، وەزیری دەرەوەی ئێران کۆبووەتەوە.
لە پەیامەکەدا هاتووە، لە دیدارەکەدا، هەردوولا بە وردی تاوتوێی پەیوەندییە دووقۆڵییەکانی نێوان بەغدا و تاران، نوێترین گۆڕانکاری و پێشهاتە ئەمنی و سیاسییەکانی ناوچەکە و دەرفەتەکانی بەدیهێنانی ئاشتییان کرد.
وەزیری دەرەوەی عێراق لە کۆبوونەوەکەدا دووپاتی کردەوە، هەڵوێستی بەغدا نەگۆڕە لە پشتیوانیکردنی چارەسەری ئاشتییانە بۆ سەرجەم قەیرانە هەرێمییەکان، و جەختی کردەوە، گفتوگۆ و رێکارە دیپلۆماسییەکان تاکە کەرەستەی دروستن بۆ تێپەڕاندنی گرژییەکان و پاراستنی سەقامگیری.
هەردوو وەزیر تاوتوێی رێگەکانی چالاککردنی رۆڵی رێکخراوی هاوکاریی ئیسلامییان کرد بۆ ئەوەی بتوانێت بە شێوەیەکی کاریگەرتر رووبەڕووی ئاڵنگارییە هەرێمی و نێودەوڵەتییەکان ببێتەوە، جەختیشیان لەسەر گرنگیی پتەوکردنی هاوکاری و هاوپشتیی نێوان وڵاتانی ئەندام کردەوە تاوەکو لە رێگەی کاری هاوبەشەوە ئاسایش و سەقامگیری بۆ تەواوی ناوچەکە دەستەبەر بکرێت.
هاوکات وەزارەتی دەرەوەی ئێران لەبارەی کۆبوونەوەیەکە راگەیەندراوێکی بڵاو کردەوە و تێیدا ئاماژەی داوە، لە دیدارەکەدا جگە لە پەیوەندییە دووقۆڵییەکانی نێوان تاران و بەغدا لە بوارەکانی ئابووری، بازرگانی و ئەمنی، هەردوولا تاوتوێی نوێترین رێڕەوە دیپلۆماسییەکانی پەیوەست بە ئاشتی و ئاسایشی ناوچەکەیان کرد.
عێراقچی هەڵوێستی وڵاتەکەی خستەڕوو و ئاماژەی بەوە کرد، هەروەک چۆن ئێران لە بەرگریکردن لە سەروەری و ئاسایشی نەتەوەیی خۆی سوور و پێداگرە، بە هەمان شێوە پێداگریشە لە بەکارهێنانی دیپلۆماسی بۆ رێگریکردن لە تەشەنەسەندنی گرژییەکان.
وەزیری دەرەوەی ئێران دووپاتی کردەوە کە نائەمنیی ئێستای گەرووی هورمز و زیانە ئابوورییەکانی بۆ ناوچەکە و جیهان، دەرئەنجامی راستەوخۆی دەستدرێژییە سەربازییەکانی ئەمریکا و ئیسرائیلە دژی ئێران؛ لەگەڵ ئەوەشدا رایگەیاند کە کۆماری ئیسلامیی ئێران ئامادەیی نیشانداوە ئەگەر پەلامار و دەستوەردانەکانی ئەمریکا رابگیرێن لە چوارچێوەی ئەو نەخشەڕێگە 7 قۆناخییەی کە تاران پێشنیازی کردووە، ئەوا ئاسایش و سەقامگیری بۆ گەرووی هورمز دەگەڕێتەوە.
لە تەوەرێکی دیکەی کۆبوونەوەکەدا، هەردوو وەزیر تاوتوێی دۆخی نیمچەدوورگەی عەرەبی و رێگەکانی کۆتاییهێنان بە شەڕی یەمەنیان کرد. عێراقچی هۆشداری دا لەوەی قەیرانی یەمەن بە زەبری هێز و گەمارۆدان چارەسەر ناکرێت، بەڵکو دەبێت لە چوارچێوەی بەندەکانی نەتەوە یەکگرتووەکان، رێزگرتن لە سەروەریی خاکی یەمەن و مافەکانی گەلەکەی مامەڵەی لەگەڵدا بکرێت، و ئامادەیی ئێرانیشی دەربڕی بۆ هاوکاریکردن لە ڕەخساندنی کەشی گفتوگۆ لە نێوان لایەنە ناکۆکەکاندا.
هەروەها عێراقچی جەختی لە گرنگیی پاراستنی پیرۆزیی شوێنە پیرۆزەکانی موسڵمانان کردەوە و گوتی، بە لەبەرچاوگرتنی ئەوەی کە سوپای یەمەن بە تەواوی بانگەشەی هێرشکردنە سەر مەککەی پیرۆز و مەدینەی منەوەرەی رەتکردووەتەوە، بۆیە دووبارەکردنەوەی ئەم جۆرە تۆمەتە ناڕاستانە لە بەرژەوەندیی گەلی ئیسلامیدا نییە و نابێت بکرێتە هۆی دروستبوونی لێکترازان و دووبەرەکی لە نێو رێکخراوی هاوکاریی ئیسلامیدا.