زیاتر لە 3 ملیۆن مامەڵە لە رێگەی ئی پسوولەوە کراون
حکوومەتی هەرێمی کوردستان رایگەیاند، لە رێگەی پڕۆژەی "ئی-پسوولە"وە زیاتر لە 3 ملیۆن مامەڵەی پارەدانی ئەلیکترۆنی ئەنجام دراون، لە کاتێکدا مەترسییەکانی هێرشی سەربازی بۆ سەر ئێران رەهەندە ئەمنی و ئابوورییەکانی لە ناوچەکەدا قورستر کردووە.
سێشەممە 20ـی تشرینی یەکەم 2026، حکوومەتی هەرێمی کوردستان رایگەیاند کە لە کاتی دەستپێکردنی پڕۆژەی ئی-پسوولە لە سەرەتای ئەمساڵەوە، زیاتر لە سێ ملیۆن مامەڵەی پارەدانی ئەلیکترۆنی لە سەرتاسەری هەرێمی کوردستان ئەنجام دراون، ئەمەش وەک هەنگاوێکی گرنگ لە پرۆسەی بەدیجیتاڵکردنی خزمەتگوزارییەکان لەقەڵەم دەدرێت.
بەگوێرەی راگەیەندراوێکی حکوومەتی هەرێمی کوردستان، لە رێگەی سیستەمی ئی-پسوولەوە، ئێستا هاووڵاتییان دەتوانن بەبێ هیچ کرێ و تێچوویەکی زیادە، پارەی پسوولەکانی کارەبا و رسووماتی شارەوانی لە رێگەی نۆ بانک و جزدانی دیجیتاڵیی رێگەپێدراو لەلایەن بانکی ناوەندیی عێراقەوە (CBI) بدەن.
حکوومەتی هەرێمی کوردستان ئاشکرای کردووە کە لە داهاتوویەکی نزیکدا کەناڵەکانی پارەدان و جۆری پسوولە و خزمەتگوزارییە حکوومەتییەکانی دیکەش دەخرێنە سەر سیستەمەکە، بە ئامانجی ئەوەی تاوەکوو کۆتایی ساڵی 2028 رێژەی 90%ـی سەرجەم شایستە و داهاتە داراییەکانی حکوومەت بە شێوازی ئەلیکترۆنی کۆبکرێنەوە.
پڕۆژەی "ئی-پسوولە" لە مانگی شوباتی 2026 لەلایەن مەسرور بارزانی، سەرۆکی حکوومەتی هەرێمی کوردستانەوە راگەیەندرا، کە لەلایەن بانکی ناوەندیی عێراقیشەوە پەسەند کراوە و وەک بەشێک لە کارنامەی چاکسازی و بەدیجیتاڵکردنی سیستەمی دارایی لە هەرێمی کوردستان جێبەجێ دەکرێت.