سوودان.. لە هێرشێکدا بۆ سەر بازاڕێک زیاتر لە 150 کەس کوژران
بەرپرسانی باشووری سوودان رایانگەیاند، سوپای سوودان بە درۆن بۆردومانی بازاڕێکی لە ناوچەی جێناکۆکی ئەبیەی کردووە.
ئەو هێرشە بووە هۆی کوژرانی زیاتر لە 150 کەس. ئەم رووداوە بە یەکێک لە خوێناویترین هێرشەکانی جەنگەکە دادەنرێت کە سنوورەکانی سوودانی گرتووەتەوە.
بۆردومانەکە ژمارەی قوربانییانی هێرشەکانی چەند رۆژی رابردووی بۆ زیاتر لە 250 کوژراو بەرزکردووەتەوە. ئەم ئامارە دەریدەخات ژمارەی قوربانییانی مرۆیی بەهۆی بەکارهێنانی فڕۆکە لە پێکدادانە چەکدارییەکانی سوودان هەڵکشاوە.
جەنگەکە لە نیسانی 2023ـەوە لە سوودان بەردەوامە، کاتێک پێکدادان لە نێوان سوپای سوودان و هێزەکانی پشتیوانی هەڵگیرسا. پاشان ململانێکان فراوان بوون و گرووپە چەکدارە ناوخۆییەکان و لایەنی دەرەکی تێوەگلێنران، ئەمەش قەیرانێکی مرۆیی بەرفراوانی لێکەوتەوە.