بە هەڵواسینی وێنەکانیان لە شوێنە گشتییەکان؛ چین کەمپینێکی رێزگرتن لە رۆحی زانایان رادەگەیەنێت
حکوومەتی چین لە رێگەی کەمپینێکی بەربڵاوی ریکلامی و میدیاییەوە لە شەقام و وێستگەکانی میترۆی شارە گەورەکانی وەک چۆنگچینگ، هەنگژۆ، ژێنگژۆ و هێفەی، وێنە و بەرهەمی زانایانی دیاری وڵاتەکەی نمایش دەکات، بە ئامانجی پەروەردەکردنی نەوەیەکی نوێ لەسەر ئارەزووی زانست و جێبەجێکردنی دروشمی "رۆحی زانایان".
ئەم هەنگاوە هاوکاتە لەگەڵ بەرزبوونەوەی بەرچاوی گرنگیدانی هاووڵاتییانی چین بە زانست؛ بەگوێرەی راپۆرتە نوێکان، 89%ی بەشداربووانی راپرسییەکی زانستی لە چین بڕوایان وایە کە زانست و تەکنەلۆجیای هاوچەرخ دەرفەتی گەشەسەندنی زیاتر بۆ نەوەکانی دواڕۆژیان دابین دەکات، هەروەها 89.2%ی خەڵک پاڵپشتیی گشتی بۆ داهێنانی زانستی بە بنەمای سەرەکیی بەهێزکردنی پێگەی جیهانیی چین دەزانن.
سەرکردایەتیی چین، بە تایبەتی شی جێنپینگ، سەرۆکی چین، جەخت لەوە دەکاتەوە کە زانست دەبێت لە خزمەتی گەشەپێدانی کۆمەڵایەتی و نیشتمانیدا بێت. شی جێنپینگ لە وتارە جیاوازەکانیدا ئاماژەی بەوە کردووە: "زانست سنووری نییە، بەڵام زانایان نیشتمانیان هەیە"، بەمەش داوا لە توێژەران دەکات بیرۆکە و لێکۆڵینەوەکانیان ببەستنەوە بە بەهێزکردنی سەربەخۆیی تەکنەلۆجیی وڵاتەکەیان.
لە لایەکی دیکەوە، سەرەڕای گەشەسەندنی خێرای کەرتی زانستی لە چین و زیادبوونی بەرچاوی بەشداریکردنی توێژەرانی چینی لە گۆڤارە نێودەوڵەتییەکاندا، کە لە ساڵی 2014دا 5,022 توێژینەوە بووە و لە ساڵی 2024دا گەیشتووەتە 32,122 توێژینەوە، حکوومەتی چین لە رێگەی بڵاوکردنەوەی رێنما و بەڵگەنامەی فەرمییەوە رووبەڕووی دیاردەی ساختەکاریی ئەکادیمی و کێشەکانی دەستپاکی لە توێژینەوەکاندا دەبێتەوە، بۆ ئەوەی رێگریی لە زانیاریی ناڕاست و بڵاوکراوەی بێ‌بنەما بگرێت.
ئەم هەوڵانەی بەیژینگ بۆ راکێشان و پەروەردەکردنی هێزی کار لە باری زانستیدا لە کاتێکدایە، لە ساڵی 2026دا ژمارەیەکی بەرچاو لە زانایان و توێژەران لە ئەمریکا و بەریتانیاوە روو لە چین دەکەن بۆ درێژەدان بە کارەکانیان، ئەمەش پێگەی چین لە کێبڕکێی جیهانیی تەکنەلۆجیا و زانستدا بەهێزتر دەکات.