سیاسی

مەسرور بارزانی سەرکۆنەی هێرشی سەر کڵێساکەی ئوردن دەکات

کوردستان مەسرور بارزانی ئوردن کڵێسای سانت جۆرج

سەرۆکی حکوومەتی هەرێمی کوردستان، سەرکۆنەی هێرشە تیرۆریستییەکەی سەر کڵێسای سانت جۆرج لە ئوردن دەکات، هاوکات پاڵپشتی خۆی بۆ گەل و سەرکردایەتیی ئەو وڵاتە لە رووبەڕووبوونەوەی تیرۆردا دووپات کردەوە.

هەینی، 23ـی تشرینی یەکەمی 2026، مەسرور بارزانی، سەرۆکی حکوومەتی هەرێمی کوردستان، لە هەژماری خۆی لە تۆڕی کۆمەڵایەتیی (ئێکس)، بە توندترین شێوە سەرکۆنەی ئەو پەلامارە تیرۆریستییە ناپاکانەی کرد کە کڵێسای "سانت جۆرج"ـی لە پارێزگای کەرەکی ئوردن کردە ئامانج.

سەرۆکی حکوومەتی هەرێمی کوردستان جەختی لە پتەویی پەیوەندییەکان و پاڵپشتیی هەرێم بۆ ئوردن کردەوە و نووسیویەتی: "کوردستان بە هەموو هێز و توانایەوە لە پاڵ ئوردنی برادا، بە سەرکردایەتیی برای بەڕێزم، شا عەبدوڵڵا دەوەستێت لە بەرەنگاربوونەوە و رووبەڕووبوونەوەی تیرۆردا."

سەرۆکی حکوومەت رایگەیاند: "سەرەخۆشی و هاوخەمی ئاراستەی کەسوکار و بنەماڵەی قوربانییان دەکەین، هاوکات هیوای زووچاکبوونەوەی بە پەلەش برینداران دەخوازین."

ئەمەش لە کاتێکدایە، ئەمڕۆ لە پارێزگای کەرەک لە ئوردن، ژمارەیەک چەکداری نەناسراو دەستڕێژی گوللەیان لە بەشداربووانی مەراسیمی بەڕێکردنی تەرمێک لە نێو کڵێسای "سانت جۆرج" کرد، بەهۆی پەلامارەکەوە لانیکەم شەش کەس کوژران و 28 کەسی دیکەش بریندار بوون.

 
 
 
کوردستان24 دیجیتاڵ میدیا ,