بەرهەمی تەماتەی جووتیارانی هەولێر بە سێ هێندەی نرخی خۆی دەکڕدرێتەوە

K24 - هەولێر

سەرمایەدارێک لە هەولێر بۆ پاڵپشتیکردن لە جووتیاران، بەرهەمی تەماتە بە سێ هێندەی نرخی خۆی، لە جووتیارانی سنوورەکە دەکڕێت و بەسەر کەمپەکان و خەڵکی هەژاردا دابەشی دەکاتەوە.

نەبوونی کارگە، کەمیی ساردکەرەوە و داخستنی رێگای نێوان هەرێمی کوردستان و شارەکانی دیکەی عێراق، وایانکردووە ئەمساڵ بەرهەمی تەماتەی جووتیارانی هەرێمی کوردستان ساغ نەبێتەوە، بۆیە شێخ باز، سەرمایەدارێکی هەولێر تەماتەی سنووری پارێزگای هەولێر دەکڕێت.
پرۆسەی کڕینی بەرهەمی تەماتەی جووتیاران، لە بەیانیی ئەمڕۆ (چوارشەممە، 8-7-2020) لە قەزای خەبات دەستیپێکرد، کە بە سێ هێندەی نرخی خۆی لێیان دەکڕێتەوە و بڕیاریداوە بەسەر کەمپەکانی سنوورەکە دابەشی بکات، ئەوەشی دەمێنێتەوە دەدرێتە خەڵکی هەژاری ناوچەکە.

دکتۆر عەبدولرەحیم عومەر، بەڕێوەبەری بەڕێوەبەرایەتیی کستووکاڵی هەولێر بە کوردستان24ـی راگەیاند "ساڵانە ئەم کێشەیە دووبارە دەبێتەوە، چونکە لەم کاتانەدا بەرهەمی تەماتەی ناوەڕاست و باشووری عێراق و هەرێمی کوردستانیش بەیەکەوە پێدەگات، کە وادەکات تەماتە لە هەموو شوێنێک هەرزان بێت.

پرۆسەکە لە کاتژمێر 05:00ـی بەیانییەوە دەستیپێکردووە و تاوەکو ئێستا (کاتژمێر 08:10ـی بەیانی) بەگوتەی عەبدولرەحیم عومەر "نزیکەی 60 تۆن وەرگیراوە، پارەکەش بە نەخت دراوەتە جووتیاران".

پرۆسەی کڕینی بەرهەمی تەماتەی #جووتیاران لەلایەن سەرمایەدارێکەوە لە سنووری #خەبات دەستیپێکرد، کە بە سێ هێندەی نرخی خۆی، لێیان دەکڕێتەوە

وێنە: هۆشمەند سادق pic.twitter.com/EpwbmtqDHb

— Kurdistan24 Kurdish (@kurdistan24tv) July 8, 2020

خشتەیەک دانراوە بۆ وەرگرتنی بەرهەمی تەماتەی سنووری هەولێر بەمشێوەیە:

8 و 9ـی مانگ بەرهەمی تەماتەی جووتیارانی خەبات
11 و 12ـی بەرهەمی تەماتەی جووتیارانی قوشتەپە
13 و 14ـی مانگ بەرهەمی تەماتەی جووتیارانی شەمامک
15 و 16ـی مانگ بەرهەمی تەماتەی جووتیارانی گوێڕ

دواتر ناوچەکانی دیکەی ماونەتەوە، ئەگەر هەر جووتیارێکیش لەو ناوچانە نەیتوانی لە رۆژی دیاریکراودا بەرهەمی تەماتەی خۆی ببات، دەتوانێت لەو شوێنانەی دیکە بەرهەمەکەی بفرۆشێت.

ئەمساڵ زیاتر لە دوو هەزار دۆنم زەویی کشتووکاڵیی پارێزگای هەولێر بە تەماتە چێنراوە، تەنیا لە قەزای خەبات 300 دۆنم زەوی بە تەماتە چێنراوە، کە هەر دۆنمێک نزیکەی حەوت تۆن و نیو بەرهەمی تەماتەی هەبووە.

دکتۆر عەبدولرەحیم عومەر باس لەوە دەکات "لەماوەی ئەم پرۆسەیەدا تەماتە بە 200 دینار لە جووتیاران وەردەگیرێت، لە عەلوەش نرخەکەی بەرزبووەتەوە بەجۆرێک کیلۆی لە150 دینار زیاتر بووە. بەگشتی ئەزمەکە ماوەی حەوت رۆژە، کە تەواو بوو ئیدی نرخی تەماتە وەکو خۆی لێ دێتەوە".

هـ.ر.