شه‌ڕى داعش و به‌رهه‌ڵستكاران گه‌يشته‌ نزيك ديمه‌شق

 K24 – هه‌ولێر

شه‌ڕى نێوان چه‌كدارانى سه‌ر به‌ رێكخراوى ده‌وڵه‌تى ئيسلامى (داعش) و گرووپ و رێكخراوه‌ به‌رهه‌ڵستكاره‌كانى سووريا له‌ ناوچه‌كانى باشوورى ديمه‌شق، به‌رده‌وامه‌.

رامى عه‌بدولڕه‌حمان، به‌ڕێوبه‌رى روانگه‌ى سووريا بۆ مافه‌كانى مرۆڤ، رايگه‌ياند، پێكدادانه‌كان له‌ گه‌ڕه‌كه‌كانى باشوورى ديمه‌شق به‌رده‌وامه‌ و چه‌كدارانى داعش ناوچه‌ى نوێيان له‌ ژێر كۆنترۆڵى هێزه‌ به‌رهه‌ڵستكاره‌كان ده‌رهێناوه‌.

گوتيشى: "ئه‌و خاڵه‌ نزيكترين خاڵه‌ له‌ سه‌نته‌رى پايته‌ختى سوورياوه‌".

ئاماژه‌ى به‌وه‌شدا، له‌ ئاكانى ئه‌و پێكدادانانه‌دا 15 كه‌س له‌ هه‌ردوولا كوژراوون و دانيشتوانى ناوچه‌كه‌ ناچار بوون، ماڵ و حاڵى خۆيان به‌جێبهێڵن.

له‌ ته‌مموزى 2014ه‌وه‌، چه‌كدارانى داعش ده‌ستيان به‌سه‌ر ناوچه‌ى "حه‌جه‌رولئه‌سوه‌د" دا گرتووه‌ و له‌وێوه‌ ده‌يانه‌وێت پێشڕه‌وى بكه‌ن.

پێشتريش چه‌كدارانى داعش هه‌وڵياندابوو، له‌وێوه‌ هه‌ڵبكوتنه‌ سه‌ر خێوه‌تگه‌ى يه‌رموكى تايبه‌ت به‌ ئاواره‌كانى فه‌له‌ستين و له‌ نيسانى رابردوودا شه‌ڕ و پێكدادان گه‌يشته‌ ده‌روازه‌كانى خێوه‌تگه‌كه‌.

له‌ ئازارى 2011دا شه‌ڕى چه‌كدارى له‌ سووريا سه‌ريهه‌ڵداوه‌ و به‌ گوێره‌ى ئامارى رێكخراوه‌ نێوده‌وڵه‌تييه‌كان له‌و كاته‌وه‌ تا ئێستا 240 هه‌زار كه‌س كوژراوون.