ئێزدى د كابينا نەهێ دا

ل دەستپێكا دەست بكاربونا كابينا نەهێ يا حكومەتا هەرێما كوردستانێ ل 10-7-2019 ب سەركێشيا بەرێز مسرور بارزانى، كارناما حكومەتێ هاتە راگەهاندن، د چەندين خالێن كارناما ناڤبرى دا ئاماژە ب مافێن پێكهاتان هاتە كرن، كو گرنگترين ئەو خالە ژى دووپاتكرنە ل پرۆسيسا پێكڤەژيانا ئاشتيا نە دناڤبەرا هەموو پێكهاتێن گەلێ كوردستانێ دا كو هەموو  پێكهات ب مافێن خۆ شاببن.

دڤێ نڤسينا خۆدا دێ پێداچۆنەكا ب لەز د ئيدار و سياسەتا حەكيمانە يا بەرێز مسرور بارزانى سەرۆكێ حكومەتا هەرێما كوردستانێ ددەرهەقا پێكهاتا ئێزدى دا كەين وەكو پێكهاتەكى رەسەن ژ گەلێ كوردستانێ كو ددرێژاهيا مێژوويێ دا تووشى گەلەك ستەم و زۆرداريێ بووين  .

هەست كرن ب ئێش و ئازارێن ئێزديان بەشەكى سەرەكى يێ پلانا سەرۆكێ حكومەتێ بوويە و ئەڤ چەندە دپێنگاڤ و خزمەتا وى يا بەردەوام بۆ ڤى پێكهاتەى دا بۆ مە دووپات دبت،  لەوا رەنگە سەرۆكێ حكومەتێ  ديتنەكا بەرفرەه بۆ پێشەرۆژا ئێزديان و گرنگيا مان و هەبونا وان دڤێ خاكێ دا هەيە.

ب شێوەيەكى گشتى پێكهاتێن گەلێ كوردستانێ و ب تايبەت ژى ئێزديان تا رادەيەكى باش هەست ب هەبون و بەرپرسايەتيێ دكابينا نەهێ دا كريە ، و ئەڤ چەندە ژى بەشەكە ژ سەرفەرازيا كوردستانێ وەكو هەرێمەكا فرە ئاينى و نەتەوەى .ل سەر ئاستێ پلە و پۆستان ئێزديان بريكار.. راوێژكار..رێڤەبەرێن گشتى ..رێڤەبەرێن دام و دەزگايان و ئەندامێن سەركردايەتيێ  هەينە و رۆلەكى كارا دگێرن، ئەڤە ددەمەكى دايە كو هيڤيێن ئێزديان مەزنترن و دخوازن پتر رۆلێ خۆ دناڤ سازيێن حكومەتێ دا بگێرن،بۆ هندێ خۆ ب خودانێ ڤى خاكى بزانن و خۆنەبينن مێڤان ل ڤى وەلاتى.

ل سەر ئاستێ پەرستگەها لالش وەكو مەزنترين پەرستگەها پيرۆزا ئێزديان ل سەرتاسەرى جيهانێ كو د جەرگێ كوردستانێ دايە ، ب پشتەڤانيا سەرۆكێ حكومەتێ چەندين پرۆژێن گرنگ و ستراتيجى لێ هاتينە ئەنجامدان ،مينا كارەبا بەردەوام ..ئاڤ، جادا سەرەكى، دەروازە ...هتد كو ئەڤ چەندە بوويە جهێ دلخۆشيا ئێزديان چونكى لالش مالا هەموو ئێزديانە.

ل سەر ئاستێ كەيسا جينۆسايدناساندنا ئێزديان ،بەرێز مسرور بارزانى ل گەل كابينا خۆ يا نەهێ پێنگاڤێن جدى هاڤێتينە بۆ هندێ ئەڤاب سەرێ ئێزديان هاتى ل سالا 2014 وەكو جينۆسايد بێتە ناسين ، و ئەڤ پێنگاڤە چ ل سەر ئاستێ نافخۆيى چ ژى ل سەر ئاستێ نێڤدەولەتى كارەكى مەزن ل سەر هاتيە ئەنجامدان،و هەولێن سەرۆكێ حكومەتێ بۆ دانانا دادگەهەكا تايبەت بۆ تاوانێن داعش ل هەرێما كوردستانێ باشترين بەلگە بوو ،لێ مخابن رێگريا حكومەتا عيراقێ  بوو ئەگەر كو ئەڤ دادگەه نە ئێتە دانان و ب ڤێ يەكێ خەونا هەموو تاكێن  ئێزدى بوو قوربانى سياسەتا شۆفينى يا حكومەتا عيراقێ.

سەبارەت رەوشا پەريشانا خەلكێ شنگال ل ناڤ كەمپان ، هەولەك هاتە دان بۆ رێكەفتنەكێ ل گەل  حكومەتا عيراقێ  ل  ئوكتوبەرا سالا 2020،و بەرێز سەرۆكێ حكومەتا كوردستانێ پێنگاڤێن باش هاڤێـتن بۆ هندێ هەردوو حكومەتێن فيدرال و يا كوردستانێ ئيمزا ل سەر رێكەفتنا شنگال بكەن ، دڤى بياڤى دا ب مخابنى ڤە نەهەر حكومەتێ عيراقێ پشتەڤان نەبوو ،بەلكو رێگرى ل پرانيا خالێن ڤێ رێكەفتنێ كرن و تا نها يەك خال ژوێ رێكەفتنێ نەهاتيە جيبەيكرن و دئەنجامدا خەلكێ شنگال دناڤا كەمپادا پترى هەشت سالايە دژيانا ئاواەريێ دا دژين.

ل سەر ئاستێ سازيێن رەوشەنبيرى يێن ئێزديان ب تايبەت ژى بنگەهێ لالش يێ رەوشەنبيرى و كۆمەلايەتى ، كو ئەڤ سازيە مەزنترين سازيا ئێزديايە ل سەرتاسەرى جيهانێ و بۆ بتر پێشخستنا كاروخەباتا ڤى بنگەهى ،بەرێز مسرور بارزانى گرنگيەكا تايبەت ب هەبونا ڤێ سازيێ ددەت و پشتەڤانيەكا بەردەوام ل كاروخەباتا وێ دكەت ژبەركو ژسالا 1993 تا نها ڤى بنگەهى كارى يە بەشەكى گرنگ يێ ديرۆك و فەلسەفە و ميتۆلوگۆيا ئێزديان ساخ بكەت ، كە واتە پشتەڤانيكرن ل ڤێ سازيا گرنگ دێ پتر ئێزديان هانددەت خزمەتا چاند و كلتۆرێ خۆ بكەن.

مامۆستايێن ئاينى يێن هەموو پێكهاتان دئيدارا كابينا نەهێ دا رێزەكا تايبەت هەيە ، ل ناڤا ئێزديان ژى هژمارەكا كەسايەتيێن ئۆلى ژ جڤاتا رۆحانى تا قەولبێژ و مجێوران رێزەكا مەزن د سياسەتا حەكيمانەيا بەرێز مسرور بارزانى دا هەنە و هەر ژبەر ڤێ رێزگرتنێ هاريكاريا وان بەردەوام تێـتە كرن بۆ هندێ بتر بكارن خزمەتا ئۆل و ئاينێ خۆ بكەن.

رێزگرتن ل پێكهاتان روويێ گەشێ گەلێ مە ب جيهانا ئاشتخواز را بتر نيشان ددەت ، لەوا تا نها  كوردستان ب مەلبەندێ پێكڤەژيان و هەڤدووقەبولكرنێ تێتە ناسين وبوويە نمونەيەك بۆ هەرێمەكە فرە ئاين ونەتەوە ل دەڤەرێ.