قەیرانی خوڵقێنەر

لەو بارە خراپەی كە تێیدا تیدەپەڕێ، چیتر كوردستان پێویستی بە ناردنی شاندی دانوستانكار نییە بۆ بەغدا، چونكە دیارە و دەركەوت بەغدا و لەپشتیشیەوە دەوڵەتی ئێران مەبەستیان ڕێككەوتن نییە، بەڵكو مەبەستیان خۆڕادەستكردنی بێ قەید و مەرجی كوردستانە بە دەوڵەتی عراق.

 ئەی چی بكەین باشە؟!

 كوردستان پێویستی بە دروستكردنی قەیرانێكی خوڵقێنەری مەزن هەیە، كە بەڕای ساددەی خۆم بە سێ خاڵ كورتی دەكەمەوە:

1- كشانەوەی هەموو لایەنە سیاسییە كوردستانییەكان لە پڕۆسەی سیاسی عراق و دەركردنی ڕاگەیەنراوێك بۆ ڕای گشتی كوردستان و عراق و دونیا (بێگومان ئەم بڕیارەش دوای ئاشتبوونەوەو ڕاگەیاندنی سازانی نیشتمانیی كوردستان دەبێ، هەر لایەنێكیش نەهاتە ژێر باری ئەم بڕیارە، خائینە بە كوردستان و خوێنی شەهیدان و بەرژەوەندی گشتی كوردستان، ئەوسا پێویستە میللەت لێیان ڕاپەڕێ و لە كوردستان دەربكرێن).

2- بەرپاكردنی خۆنیشاندان و ڕاپەڕینی جەماوەری بەردەوام  و نەپساوە لە بەغدا، كەركوك، موسڵ، خانەقی، مەخمور، گوڵاڵە، مەنەلی، داقوق و گشت ئەم ناوچانەی كە داگیركراوەن و ناوچە كوردستانییەكانی دەرەوەی هەرێمن (بێگومان ئەوەش لێكەوتەی توندوتیژی و ئاڵۆزی  زۆری دەبێت و من و تۆ و زۆرانی تریش شەهید و بریندار و بەندكراو دەبین و باوەڕیشم بەم قسە بێ مانایەی ترسنۆكەكان نییە كە دەڵێن -كوڕی خەڵك بە كوشت نەدەن- ئەوە وەكو ئەوە وایە كە بەخەڵك بڵێی خۆتان ڕادەست بكەن، كورد گووتەنی ح.....زی و سەلامەتی).

3- دۆزینەوەی فۆرمێكی نوێ و گونجاو بۆ یەكخستنی هێزی پێشمەرگەی كوردستان و جێگیركردنیان لەنزیك سنوورەكانی ناوچە داگیركراوەكانی دەرەوەی هەرێم و ئامادەكردنیان بۆ هەر گۆڕانكارییەكی خێرا، لە پاڵ ئەوەشدا دەرگای ناونووسین بۆ خۆبەخشان و فیداكارانی سڤیل بكرێتەوە.

دەرەنجامەكان چۆن دەبێت؟

بێگومان ئەوەی دەیڵێم پێشبینی و گریمانەیە، ناڵێم ئەم كارە ئاسان دەبێ، بەڵام كوردستان تەنها بەم سێ هەڵوێستە دەتوانێ گەورەترین كێشە و قەیرانی بنەڕەتی بۆ بونیادی دەوڵەتی عراقی داگیركەر دروست بكات، چونكە دەرچوونی دووەمین پێكهاتە لە پرۆسەی سیاسی عراق كارێكە نە بۆ دەوڵەتۆكەی عراق ئاسانە نە بۆ ئەمریكا و كۆمەڵگەی نێودەوڵەتیش جێیگای ڕەوزامەندییە، چونكە بەم شێوەیە، دەوڵەتی عراق متمانەی نێودەوڵەتی لەدەست دەدات یاخود متمانەكەی لاواز و بێ هەژموون دەبێ، هەروەها كۆی دەوڵەتەكەش مژوولی سەكوتكردنی خۆنیشاندانەكان و ڕاپەڕینی خەڵكی كوردستان دەبێت كە ئەوەش بە هێزی نەرم جێبەجێی ناكات بەڵكو بە هێزی ئاگر و ئاسنەوە دەبێت و قوربانی و خوێن ڕشتن دەست پێدەكاتەوەو عراق دەگەڕێنێتەوە خانەی یەكەم (سفر) و دەیخاتەوە سەر ڕێچكە ڕاستەقینەكەی خۆی كە ئەویش ئەتواری دەوڵەتی داگیركەری عراقە لە 102 ساڵی ڕابردوویدا بۆ داگیركردنی خاكی كوردستان.

ئەم پلان و پیلانە، پێویستی بە گیانی ئازایەتی و سەركێشی سیاسی هەیە، هەروەها پێویستی بە دلێری و قوربانیدان و تێگەیشتنی بەرزی چین و توێژەكانی كۆمەڵگەی كوردستان هەیە (بێگومان بەهەموو پێكهاتە نەتەوەیی و ئاینییەكانییەوە).

ئایا بەم زوانە ئەم هەڵوێستە حەكیمە پڕ بەرهەمە لە كوردستان دەبینین، یاخود كوردستان بە قەدەری ڕەشی خۆی ڕازی دەبێت؟!