تریفە دۆسکی
نووسەر
مرۆڤ وه‌ك ئه‌كته‌رێ ده‌نگدانێ
مرۆڤ وه‌ك بونه‌وه‌ره‌كی جڤاكی به‌شداریه‌ك گرنگ هه‌یه بۆ سه‌لماندنا ده‌ستهه‌لاته‌كا سیاسى وئه‌ركه‌كێ ئه‌خلاقى ل سه‌ر ملێ وى هه‌یه وه‌ك تاكه‌كی ئه‌كتیڤ. لێ ئایا خه‌لكى یان ملله‌تی ده‌ستهه‌لات هه‌یه كو ئه‌و ببنه خودان بریارا كرن و نه‌كرنا هه‌لبژارتنان؟.
هه‌ر ده‌ستهه‌لاته‌كێ په‌یام و پرۆژه‌یێن خۆ هه‌نه، میكانیزما ئه‌نجامدان و نه ئه‌نجامدانا هه‌لبژارتنان ل دویڤ پرۆژێ پاراستنا ره‌وشا خۆ دده‌ت، ئه‌لبه‌ت پاراستنا ره‌وشا هه‌رێمێ گه‌له‌ك دگرنگه و ئارمانجه‌كی سه‌ره‌كییه، هاوه‌لاتی ژی یان ئه‌م بێژن (تاك) ئارمانجه‌كی ڤه‌بره بێ گومان، ژبه‌ر هندێ نابیت بهێته دویرخستن ژ گفتوگۆیا سیاسی، چونكی رۆله‌كی ناڤه‌ندی دبینیت.
تاك واتا وه‌لات دده‌ت ده‌مێ گفتوگۆ دهێته ئه‌نجامدان، جه‌مسه‌رێن سیاسی د گفتوگۆیێن هه‌لبژارتناندا بریارێ ل سه‌ر دیموكراسیكرنا پرۆژێ دده‌ن، به‌حسا داموده‌زگه‌ه و سیسته‌م و ژیان و ژیارا خه‌لكی دهێته‌كرن ب واته‌یه‌كی دی هه‌می بارودۆخێن سیاسی و كۆمه‌لایه‌تی و ئابۆری سیبه‌را خۆ دهاڤێژنه ل سه‌ر بانگه‌شه‌یا هه‌لبژارتنان.
سه‌ر هندێرا ژی لبه‌ر چاڤ وه‌رگرتنا ره‌وشا ئاشتیێ و ته‌بایێ، به‌لێ هاوه‌لاتی گرنگه خودانێ بریارێ بیت، ژبه‌ر هندێ ژی گه‌له‌ك جاران هه‌لبژارتن هاتنه پاشئێخستن، به‌لێ پێدڤییه بهێته رۆنكرن ژی، پاشئێخستن نابیته ژده‌ستدانا مافێن تاكێ سه‌ربه‌خۆ، د ده‌ستنیشانكرنا هێزا جه‌وهه‌ریدا، هه‌ر وه‌سا ژی بۆ زانین هه‌لبژارتن پرۆسێسه‌كا ته‌كنیكی و سیاسییه، و كریاره‌كا شارستانییه ژی كو تێدا به‌ربژێر و ده‌نگده‌ر رۆله‌كی سه‌ره‌كی دبینن بۆ سه‌لماندنا ئاستێ هه‌لبژارتنان.
ئه‌م كورد نه‌ته‌وه‌ك مه‌زنن و پتریا جیهانێ مه دنیاسیت پشتی ئه‌م وه‌ك هه‌رێم ل شه‌رێ داعشێ هاتنه نیاسین وه‌كی ملله‌ته‌كی خودان ئیراده و هێز، كو شیا به‌رگریێ ژ پاراستنا ئاخا خۆ بكه‌ت و پشكداریا پێشمه‌رگه‌ی د ئازادكرنا ده‌ڤه‌رێن داگیركریدا ناسنامه‌كا ب مه هاتیه به‌خشین و ئه‌م به‌رنیاسبوون ب ئازایه‌تی و مێرخاسیێ، له‌ورا گرنگه ئه‌و وێنه د پرۆسێسا مه‌یا هه‌لبژارتناندا ژی بهێته پێشچاڤ. پێدڤییه ئه‌م بسله‌مینن ب تایبه‌ت كو ئه‌ڤ هه‌لبژارتن ژئالیێ كۆمسیۆنا بلندا سه‌ربه‌خۆڤه دهێنه برێڤه‌برن ل به‌غدایێ، بێ گومان ژی هه‌ر پرۆسه‌یه‌كا ده‌نگدانێ دێ كێم و كوریێن خۆ هه‌بن ل دیمۆكراسیترین وه‌لات وه‌ك ده‌وله‌تێن ئه‌سكه‌نده‌ڤی وه‌كی پێشێلكاری و نه‌عه‌داله‌تی ل به‌رامبه‌ر په‌نابه‌ران و هه‌بوونا ره‌گه‌زپه‌ره‌ستیێ و زێده‌بوونا بێكاریێ.
ل ڤێرێ مه‌به‌ست ئه‌وه ل سه‌ر ئاستێ هه‌رێمێ د ئه‌ڤان سالاندا چه‌ندین كێماسی هه‌بن ژی وه‌كی دره‌نگ هاتنا مووچه‌ی و رێژا بێكاریێ بۆ گه‌نجان و...هتد، لێ یا گرنگ ئه‌وه وه‌ك هاوه‌لاتی ب ره‌شبینانه‌ڤه كۆمه‌لگه‌ها خۆ سالوخ نه‌ده‌ت و خۆ كێم نه‌كه‌ت و ده‌نگدانێ و هه‌لبژارتنان بكه‌ته ده‌لیڤه و بێژیت ما بۆ مه چ كریه؟
ئه‌م خودان دیرۆك و بیرهاتنێن خۆش و نه‌خۆشن، گرنگه ل ئه‌ڤێ قۆناغێ بهایێ هه‌ر تاكه‌كه‌سه‌كی ئه‌ڤێ جڤاكێ بزانین و ئه‌و چه‌ندین هه‌ژی خزمه‌تكرنێنه. هه‌لبژارتن بلا ژ بازنێ حزبایه‌تی بچیته ناڤ روحا هاوه‌لاتی بجۆش و خرۆشڤه، رۆژا گرێدانا مه ب ناسنامه‌یا خۆڤه كو ئه‌م بده‌نه نیاسین، وزه‌یه بۆ هاوه‌لاتییان داكو كاره‌كی ئه‌نجام بده‌ین و تێدا پاشه‌رۆژا خۆ ده‌ستنیشان بكه‌ین وه‌ك ملله‌تێ كورد و وه‌ك تاكه‌یه‌كی ئازاد ل هه‌رێمه‌كا ئارام و سه‌ربه‌خۆ.