تهرزه جاف
نووسەر
كەیسەكەی سێوان بە كوێ گەیشت؟
دوای مەرگی سێوان و منداڵەكانی، چەندین كچ و ژنی دیكه سووتان و كوژران، بەڵام ئەو كاردانەوەیەی سووتانی سێوان بەدوای خۆیدا هێنای، بێوێنە بوو، ئەمەش بێ هۆكار نییە.
دەبێت بوێرین و دڵمان بێت بە راشكاویی ئەو هۆكارانە بخەینەڕوو، كە سێوان لە ئەوانی دیكه جیا دەكاتەوە، بە تایبەت كە مەرگی سێوان هاوكات بوو لەگەڵ تێپەڕبوونی ساڵێك بەسەر سووتانی سەروینی جوانەمەرگ، كە ئەویش ئەوكات، كاردانەوەیەكی زۆری بە دوادا هات، بەڵام كەس نازانێت چارەنووسی كەیسەكەی بە كوێ گەیشت.
خۆم یەكێك بووم لەو كەسانەی هیوام هەبوو خوێنی سەروین بەهەدەر نەڕوات و كەیسەكەی بە ئەنجامێك بگات، بەڵام نەك هەر كەیسەكە دەنگی نەما، بەڵكو لەوانەیە، زۆر كەس هەر بیریشی نەما بێت.
لە سەروبەندی كاریگەریی كارەساتی سێوان و منداڵەكانی، ژنی دیكهیش كوژران و سووتێنران و مردن و نەیانتوانی كاریگەریی سێوان (بۆ ماوەیەك) لە راگەیاندن و سۆشیال میدیا كاڵبكەنەوە. ئاخر ژمارەی ئەو كچانەی دەسووتێنرێن و دەكوژرێن، هەندێكجار وا دەردەكەوێت (چونكە ئاماری روون نییە) كە لە هەژمار نایەن و لە نێوان (سەروین و سێوان)ێكدا، دەیان ژن و كچی دیكه، بوونەتە قوربانی.
بەهێزترین هۆكار، وایكرد كەس نەتوانێت چاوپۆشی لەم كارەساتە بكات، ئەوەبوو كە سێوان سەرەڕای ئەوەی لەسەدا نەوەدی جەستەی سووتا بوو، كەچی وەك موعجیزەیهك تا ئەوكاتەی هەموو راستییەكانی دركاند، زیندوو مایەوە، هۆشیارانە داوای سزادانی بكوژی خۆی و منداڵەكانی دەكرد، داوای دەكرد كە (ئەم كەیسە دانەخرێت).
سێوان وەك ئەوەی لە مەرگەوە گەڕابێتەوە، چیرۆكەكانی گێڕایەوە.
هۆكارێكی دیكه، هاوسۆزیی سەرۆكی حكومەتی هەرێمی كوردستان بوو. پێش ئەوەی ڕوون ببێتەوە، كە سووتانی سێوان و منداڵەكانی ڕوواوێكی ئاسایی نەبووە، دڵگرانیی خۆیی دەربڕی و ئامادەیی نیشاندا بۆ هەموو هاوكاریەك و زۆر باوكانە داوای لە خەڵك كرد، ئاگایان لەخۆیان بێت.
پێمان خۆش بێت، یان نا، ئەم جۆرە هەڵوێست و هاوسۆزییانە، كاریگەریی گەورەی دەبێت لەسەر رای گشتی و خەڵكێكی زۆر. دەتوانین بڵێین سەركردەكان دەتوانن كاریگەریی ئەرێنیان هەبێت، لە بنبڕكردن و رێگرییكردن لەو ڕەشەكوژیەی ژنانی كورد. بە پێچەوانەشەوە، بێدەنگی و بێهەڵوێستییان، ئەوەندەی دیكه دەرگا بە رووی كارەساتەكان واڵا دەكات.
هۆكارێكی دیكهی هاوسۆزیی كۆمەڵگە بەرانبەر كەیسی سێوان بۆ ئەوە دەگەڕێتەوە، كە سێوان خائین نییە. كۆمەڵی كوردستان لەوە دڵنیایە، سێوان گوناحێكی نەبووە. ژنێكی شۆخی گەنج، دایكی سێ منداڵ، بە وەفا بەرانبەر مێردەكەی، حەزی لە كەس نەكردووە، داوای تەڵاقی نەكردووە و لە ماڵی مێردەكەی ماوەتەوە، تا ئەو رۆژەی بووە كۆی زووخاڵ. كەواتە شایستەی ئەوەیە بەرگریی لێ بكرێت.
ئەوەشمان بیربێت، سێوان تەنیا نەبوو، پێش مردنی خۆی سێ منداڵی دەستبەجێ سووتان و بوونە قوربانی.
كۆمەڵگە بەگشتی قوربانیی خۆش دەوێت، زیاتر یادی شیوەن و كارەساتەكان بە گەرمی دەكاتەوە، نەك سەركەوتن و سەروەرییەكان. دەبێت لەخۆمان بپرسین:
ئەگەر سێوان وێنە پێڕفێكتەكەی كۆمەڵگەی نیشان نەدایە؟
ئەی ئەگەر سێوان ماڵی جێهێشتبووایە؟
داوای تەڵاقی بكردایە؟
ئەی ئەو سێوانە چی بكات؟
ئەگەر نەیتوانی ئەو هەموو سۆزەی كۆمەڵگە و سەرۆكەكان بهەژێنێت و پێویستی بە یاسا بوو؟
ئەوەی ئەم خاڵانەی سەرەوەی بەهێز كردووە، تەنیا یەك هۆكارە:
یاسا سەروەر نییە و كۆمەڵگە حیساب بۆ یاسا ناكات و متمانەی پێناكات، هەر بۆیەش سێوان تا دوا هەناسەی هەر داوای دەكرد (ئەم كەیسە دانەخرێت).
كاتی ئەوە هاتووە بپرسین: كەیسەكەی سێوان بەكوێ گەیشت؟