
مللەت عیسمەت
نووسەر
ڕێبەریا سەرۆک بارزانی بۆ گۆهرینێن ڕۆژئاڤا و دەڤەرێ

بکارئینانا چەمکێ ڕێبەر دەرخەرێ وێ ڕاستیێ جەنابێ ڕێزدار “سەرۆک بارزانی”، سەنگ و هێزا خۆ ژ دەستهەلاتەکێ ناوەرگریت و سەرکردایەتیا جەنابێ وان نەبتنێ ب دەم و جهەکی ڤەگرێدایە، بەلکو حەقیقەتەکە جەنابێ وان کارێزما و ئیلهامبەخشە و دیتن و بوچون بۆ ڕۆیدانێن دیرۆکێ و بنیاتنانا پاشەڕۆژێ هەیە.
رۆلێ “سەرۆک بارزانی” دگۆهرینێن رۆژئاڤا و دەڤەرێدا بتنێ ڕۆلەک نینە گرێدایی ڕۆیدانێن ڤێ دوماهیێ یێن پشتی کەفتنا ڕژێما ئەسەد و ڕزگارکرنا دیمەشقێ بیت، بەلکو ڕۆیدانێن پشتی دەستپێکرنا شۆڕەشا سوریێ ل سالا ٢٠١١ێ و هەولێن جەنابێ وان ل سالا ٢٠١٢ێ و ڕێکەفتنێن دهۆک ئێک و دهۆک دوو و هەروەسا ڕێکەفتنا هەولێر یا لایەنێن ڕۆژئاڤا دسەلمینن سەرۆک بارزانی وەکو کەسایەتی خۆدان دیدگەها ستراتیژی یا بابەتیانەیە، هەلویستێ خۆ دیار کریە و دەرگەهێ دانوستاندنێ دگەل هەمی لایەنان هەیە.
ددوماهی دیدارێن خۆدا دگەل هێزێن (ئەنەکەسە و هەسەدێ) و دیدار دگەل بەڕێز “مەزلووم عەبدی" و پێداگیری ل سەر دیالۆگ و دانوستاندنا بەردەوام پێشڤەچوونا دوزا گەلێ کوردستانێ یە ل رۆژئاڤا، جەنابێ “سەرۆک بارزانی” نە بتنێ ڕۆلێ ناڤبەینکاریێ دناڤبەرا نافخۆییا ڕۆژئاڤایێ کوردستانێ دگێریت، بەلکو جەنابێ وان کارێزمایەکا ئیلهامبەخشە دشێت ژ پێخەمەت ئارمانجێن هەڤپشکێن نەتەوەیی و نشتیمانی ڤان هێزان کۆمبکەت و دئاراستێ ئاشتیێ و دانوستاندناندا ئاراستەبکەت.
ددوماهی دیدارا خۆ یا میدیاییدا “سەرۆک بارزانی” دگەل میدیاکارێ ناڤدار “ئیلی ناکوزی” هەر وەکی د دەستپێکا دیدارێدا گوتی “سەرۆک بارزانی ب ڕاستگۆیانە پەیامێن خۆ دەردبڕیت و پەیامێن وان پێدڤی ب تاویلێ ناکەن” و ئەڤە هەلویستێن جەنابێ سەرۆکێ بۆ گشت دەڤەرێ و ب تایبەتی کاودانێن بۆ رۆژئاڤا هاتینە پێش خواندنێن واقعینە و دگونجن دگەل ڕەوشا پرئالۆزا دەڤەرێ و مفابەخشن بۆ چارەسەریێ."
سەرەرای ئالۆزیێن د دەڤەرا رۆژهەلاتا ناڤەراستدا هاتینە پێش، هژمارەکا دەرفەتان ژی دگەل داهاتیە پێداچوون ب وێ ڕەوشا دیرۆکی یا سەر ب گەلێ کورد و پێکهاتێن دەڤەرێدا ئینایی بهێتە کرن، هەر وەکی جەنابێ سەرۆک بارزانی ئاماژە پێدای “ئینەتێن باش” ئەگەر ئنیەت دباشبن بجهئینانا وان دێ یا ب سەناهی بیت.
سیناریویێن ددەڤەرێدا رویددەن بێگۆمان فاکتەرێن نافخۆیی و هەرێمی و نیڤدەولەتی هەنە، لێ ئەو بنەمایێ ژیوارێ جەنابێ سەرۆکی بۆ دچیت ڕاسترین میتودە ڕێکخستنا و لێکنێزیکرنا ناڤمالا کوردستانی، چونکی بنەمایەکێ سیاسی هەیە دبێژیت: پەیوەندیێن دەرڤە ل سەر بنەمایێ پەیوەندیێن نافخۆی دهێنە درۆستکرن. ئەڤ دیتنا ژیواری و ئەقلانی دگەل ڕا و بوچون و دنیابینینا جەنابێ سەرۆک بارزانی ئێک دگرن.
ڕاستە دەلیڤەیەکا مێژوویی بۆ گەلێن دەڤەرێ هاتیە پێش و گۆهرانکاریێن بلەز د دەڤەرێدا درۆست دبن، لێ یا ڤێ قۆناغا دیرۆکی جودا دکەت کوردان و پێکهاتێن دەڤەرێ رێبەرەکێ کارێزمایێ وەک سەرۆک بارزانی هەیە دشێت هەمی لایەنان کۆم بکەت و رۆلەکێ نشتیمانیێ ئاشتیخواز و پر دەستکەفت بۆ گەلێ کوردستانێ و گەلێن دەڤەرێ بگێریت.
بێگۆمان ڕێبەر و سەرۆک و سەرکردەیەکێ مینا جەنابێ وان ل کیرا دنیایێ هەبایە؛ ب گوتن و کریار ب سەلمینیت دگەل مافێن هەر نەتەوەیەکا مەزلوومە و نەبتنێ نەتەوەک ژی بەلکو ئەگەر تاکە مرۆڤەک ژی بیت ژمێژە هەژی خەلاتێ نۆبلا ئاشتیێ بوو و ڕویدانێم دیرۆکی ئەڤە سەلماندیە لێ دەنگێ گەلێن بێ دەولەت زوی ناگەهیت!