لە ئەمەریکا دەرفەتی کار بۆ خاوەن بڕوانامەکان دەڕەخسێندرێت
لە رێگەی بەرنامەیەکەوە کار بۆ خاوەن بڕوانامەکان دەدۆزرێتەوە
K24 - هەولێر
لە ئەمریكا لەرێگەی بەرنامەیەكی نوێ، کە ترەمپ و ئیڤانکای کچی واژۆیان لەسەر کرد، هەوڵی رەخساندنی ھەلی كار بۆ دەرچووانی كۆلێژ و پەیمانگەكان دەدات، بەرنامەکەش زیاتر ئەو كەسانە دەگرێتەوە، كە بڕوانامەیان بەدەستھێناوە و خاوەن توانا و بەھرەن لە بوارەكەیاندا.
دۆناڵد ترەمپ، سەرۆكی ئەمریكا رایگەیاند "ھەموو شتێك دەگەڕێتەوە دۆخی جاران و دەرفەتی كار دەڕەخسێنینەوە، ھەموو ھەوڵێكی خۆمان دەدەین بۆ ئەنجامدانی چاكسازی لە دامەزراوەكانی حكومەت و رەخساندنی ھەلی كار. پرۆژەیاساكە پێشكەشی حكومەت دەكەم و لەو ماوەیەشدا دەبێت لەسەر بنەمای نمرەی بەرز و شارەزاییەوە خەڵك لەسەر كار دابمەزرێ. حكومەت كار لەسەر بەھرە و توانا دەكات".
حكومەتی فیدراڵی ئەمریكا بەم ھەنگاوەی دەیەوێ رووبەڕووی زیانەكانی كۆرۆنا و کاریگەرییەکانی لەسەر ئابوورییەكەی ببێتەوە، بەتایبەتی لەماوەی سێ مانگی رابردوودا، بەھۆی بڵاوبوونەوەی ڤایرۆسی كۆرۆنا، زۆربەی بازاڕەكانی جیھان داخراون، ئەمەش دەیان ملیۆن كەسی لە ئەمریكا بێكار كردووە.
ئیڤانکا، کچە گەورەی دۆناڵد ترەمپ و راوێژکاری لەبارەی سوودمەندانی بەرنامەکە دەڵێ "لەماوەی بەڵێنەکانی ئێمە بۆ ھاووڵاتیانمان لەبارەی دۆزینەوەی كار، ھەماهەنگییەكان لەگەڵ كەرتی تایبەت بەردەوامن بۆ راھێنان و فێركردنی قوتابیان، بۆ ئەم مەبەستەش 16 ملیۆن قوتابیی دەرچوو و كرێكار سوودمەند دەبن لەو پرۆژەیە، ئەم پرۆژەیەش بەردەوام دەبێت تاوەکو مەترسییەکانی ڤایرۆسەکە كەم دەبنەوە".
ھەفتەی رابردوو وەزارەتی كاری ئەمریكا رایگەیاند، سەرەڕای زیانەكانی كۆرۆنا و داخرانی بازاڕەكان، بەڵام زیاتر لە ملیۆنێك و 400 ھەزار قوتابی دەرچووی نوێ داوای دامەزراندنیان كردووە، بەگوێرەی ئامارەكانیش لەسەرەتای مانگی ئاداری ئەمساڵەوە تاوەكو ئێستا؛ زیاتر لە شەش ملیۆن قوتابی دەرچوو كاریان دەست نەكەوتووە.
هـ.ر.