باژێرێ زاخۆ ژبێخودانیێ بەرەڤ ئاڤەدانیێ

د چوارچۆڤەیێ پلانا فەرمی یا حکومەتا هەرێما کوردستانێ دا بۆ پێشڤەبرنا خزمەتگوزاریان بریار لسەر دامەزرادنا ئیدارا سەربەخۆیا زاخۆ هاتە دان ل رێکەفتی ( ل ٢٠ی ئیلۆنا ٢٠٢١ێ ) 

ئارمانجا سەرەکی یا دامەزراندنا ئیدارا سەربەخۆ یا زاخۆ، نێزیککرنا خزمەتگوزاریێن حکۆمەتێ بوو بۆ هاولاتیان، بتایبەت د وارێ تەندروستی، خواندنا بلند، کارەبا، ئاڤا ڤەخوارنێ و رێک و پرا و هەمی وان خزمەتگۆزاریێن دبەرژەوەندیا باژێری بگشتی و خەلکێ بتایبەتی دا، جەنابێ سەرۆک وەزیران " مەسرور بارزانی " لدەمێ دامەزرندنا ئیدارا سەربەخۆ یا زاخۆ ئاماژە بهندێ دا کو ئەڤ گوهۆرینە دێ بیتە هاریکار بۆ پێشکەتنا زاخۆ و بهێزکرنا رۆلێ وێ وەک باژێرەکێ سنۆری و بازرگانی.

بێگۆمان دنهادا ئەڤ چەندە بۆیە ژیوار و زاخۆ د ڤان چار سالان دا ب تەمامی هاتیە گۆهارتن ژ باژێرەکێ بچوویک بۆ مەلبەندەکێ گەشتیاری و بازرگانی و ئاڤادانیێ، هەلبەت ئەڤ چەندە ڤەدگەرت بۆ پشتەڤانیا جەنابێ سەرۆک وەزیران و کار و پلانێن سەرپەرشتێ ئیدارا سەربەخۆ یا زاخۆ رێزدار " گوهدار شێخو " کو دڤان سالان دا کەدەکا مەزن مەزاخت بۆ هندێ ئێدی خەلکێ زاخۆ هەست ب وێ بێخودانیێ نەکەن یا جاران دهاتە گۆتن و ئەو چەندە سەلماند کو زاخۆ نەهاتیە پشگوهـ ئاڤێتن و باژێرەکە هەم بۆ حزبا مە یا پارتی دیمۆکراتی کوردستان و هەم بۆ حکۆمەتا هەرێمێ باژێرەکێ گرنگە و د پلانا ستراتیژیا کابینا نەهێ یا حکۆمەتا هەرێما کوردستانێ دا بهایەکێ مەزن هەیە .

وەکی مە لسەر ئاماژە پێکری پشتی زاخۆ کەفتی د قۆناغا ئیدارا سەربەخۆ دا و رێزدار گوهدار شێخو  وەکو ئێکەم سەرپەرشت هاتی دانان، چەندین پلانێن ژ هەژی بۆ ڤی باژێری هاتن ئامادەکرن و دچەندین قۆناغان دا ئەڤ پرۆژە کەفتن د بوارێ جێبەجێکرنێ دا و پاشان کەتن دخزمەتا خەلکێ دا .

پێشڤەبرنا پرۆژەیان و خزمەتگوزاریان

پشتی دامەزراندنا ئیدارا سەربەخۆ، زاخۆ بۆ دەڤەرەکا پێشکەفتی یا خزمەتگوزاریان، وەکی ئیدارا سەربخۆ بەری سالەکێ دای دیارکرن د ماوێ سێ سالان دا، ٢٨٦ پرۆژەیێن فەرمی پەسەندکربوون، کو ٢١٨ ژوان هاتبوون تەمامکرن و ٦٨ یێن دی د پێشڤەچوونێ دا بوون وی دەمی، بێگۆمان د نووکەدا ئەڤ سەرژمێرە بلندتربوویە و پرۆژە پتر هاتیە پەسەندکرن و جێبەجێکرن، هەمی پرۆژە د وارێ هونەری و بیناسازی و قیرکرنا جادە و کولانان و ژێرخانا باژێری و خواندنا بلند، کشتوکال، تەندروستی، پێشەسازی و کارەبا و گەشتیاریێ دا بوون.

ب شێوەیەکێ تایبەت، زاخۆ پێشکەتنەکا مەزن د وارێ قیرکرنا جادە و کۆلانان دا دیت، ب گوهۆرینا ٨٠ بو ۹. ٪ ژ رێکێن باژێری. هەروەسا، نەخۆشخانا گشتی یا زاخۆ و نەخۆشخانا فێربوونا پزیشکی هاتن نوی کرن و ب ئامیرێن نوی هاتن چاککرن. هەروەسا، نەخۆشخانا گشتی یا باتیفا و نەخۆشخانا زارۆکان ژی هاتن دامەزراندن.

رۆلێ زاخۆ د بازرگانی و گەشتیاریێ دا

زاخۆ ب شێوەیەکێ گرنگ د بازرگانیا نیڤدەولەتی دا بهێز بوویە، ژبەر هەبوونا خالا سنۆری یا "ئیبراهیم خەلیل". هەروەسا، دنهادا دەڤەر وەک جهەکێ گەشتیاریێ یێ بلند دهێتە دیتن و سالانە رێژەکا ئێکجار مەزن یا گەشتیاران قەستا باژێرێ زاخۆ دکەن ژ ئەگەرێ رێکخستن و جوانیا باژێری و ئەوان کەرنەڤال و فیستەڤال و ئاهەنگ و بۆنەیێن ژلایێ ئیدارا سەربەخۆ یا زاخۆ ڤە دهێنە ئەنجامدان، هەردیسان جوانکرنا روویێ پرا دەلال و رووبارێ خابیری و نوژەنکرنا جهێن گەشتیاری و کەلتوری و دێرین .

بگشتی پشتی بریارا جەنابێ سەرۆک وەزیران و دەستبکاربوونا رێزدار گوهدار شێخۆ وەکو سەرپەرشتێ ئیدارا سەربەخۆ یا زاخۆ، باژێر رۆژ بۆ رۆژێ گەشەیێ و وەرارێ دهەمی بواران دا دکەت و رویێ باژێرەکێ مودێرن و ئاڤا ل زاخۆ دیار دکەتن، لەورا وەک خەلکێ زاخۆ ئەم سوپاسیا حکۆمەتا هەرێمێ دکەین بۆ ڤێ گرنکیدانێ ب ئاڤەدانکرنا هەمی باژێر و ناوچەیێن هەرێمێ بگشتی و باژێرێ زاخۆ ب تایبەتی .