شورەشا گولانێ ب دروشمێ خوراگری، بەردەوامی و ئومێدبەخشین دەست پێ کر

شۆڕەشا 26ێ گولانا پێشکەفتنخواز، 49 ساڵان بەری نها، ل ساڵا 1976ێ وەک درێژەپێدەرا شۆڕەشا ئیلوونا مەزن دەستپێکر و وەرچەرخانەکا مێژوویی د پێڤاژوویا خەباتا رزگاریخوازا گەلێ کوردستانێ دا بەرپاکر.

پشتی رێککەفتنا خیانەتکاری یا جەزائیرێ، کو د ئەنجام دا شۆڕەشا ئیلوونێ راوەستییا، بەلێ ژبۆ تەمامکرنا وان ئارمانجێن بزاڤا ئازادیخوازا کوردستانێ، یێن هێشتا ب دەستڤەنەهاتین، و لدیڤ رێنمایێن بارزانیێ نەمر ئەندازیارێن ڤێ شورەشێ هاتنە دەستنيشانکرن هەردوو سەرکردێن خودان ئیرادە و یێن خۆ بۆ دوژمنان نەچەماندی سەرۆک بارزانی و ئدریسێ جانەمەرگ بوون. 

هەردوو شێرە سەرکردان ب شێوازەکێ نوی پارتی ئاڤاکر ڤە و پێکهاتێن پێشمەرگەی بەرهەڤکرن و خەملاندن و شورەش ژی ب شێوازێ پارتیزانی نویکرەڤە، و دەمەک کێم دا رێکخستنێن پارتی و مەفرەزەیێن پێشمەرگەی ل سەرتاسەری کوردستانێ بەلاڤبوون و دەست ب چالاکیێن رێکخستنێ و یێن روشەنبیری و هشیارکرنێ و چەکداری کرن. 

پێشمەرگەهیێن قەهرەمان ب لویلیێن تڤەنگێن خۆ، بەرسڤەکا رۆهن و وێرەک هەمبەر پیلانێن نەیار و دوژمنان داڤە و خەتیرا شۆڕەشا گولانێ ب هەناسە و بێرکرنەڤەیەکا نوی و سەردەمیانە هەلکر، چەکێ بەرەڤانی و شەڕەفێ هەلگرتەڤە و دەست ب خەبات و تێکۆشین و پارتیزانیێ کر و ب مێرخاسی دەهان داستانێن ب رۆمەت تۆمارکرن.

ئەڤێ شۆڕەشا مەزن چەند ساخلەتەکێن گرنگ هەبون، ئەوژیك فرەپارتایەتی وەک رەگەزەکێ سەرەکی یێ دیموکراسیێ هەمبێزکر و بەرەیێ (جۆد) پەیدابوو و ئاشتبوونەڤەیا نیشتمانی. د هەمان دەمدا هەر ژ ساخلەتێن گرنگ یێن شۆڕەشا گولانێ، تۆڕا پەیوەندیێن پارتی دیموکراتی کوردستان ل سەر ئاستێن کوردستانی و جیهانی، گەلەک بەرفرەهـ و ب هێز تر لێهات.

شورەشا 26ێ گولانێ هەمی پیلان و ستراتیژیێن دەولەتا داگیرکەرا عێراقێ ژ ناڤبرن، رۆژ بۆ رۆژێ ئاگرێ شورەشێ گەشبوو و پارتی ب حیکمەتا سیاسیا سەرۆک مەسعود بارزانی کو شیا تەڤایا پارت و لایەنێن کوردی دبن سیهوانا بەرەيێ کوردستانی کۆمبکەت (2/5/1988) هەتا بهارا 1991ێ سەرکرداتییا سەرهلدنا پیرۆز کر.

دەستکەفت و سەروەریێن ڤێ شورەشێ گەلەکن و سەرکەفتن و هەلبژارتنێن دیموکراسی بۆ ئاڤاکرنا پەرلەمان و دامەزراندنا حکومەتا هەرێما کوردستانی و ئەڤ پرۆسەیا بەردەوام یا ئاڤەدانیێ و پێشڤەچوونێ لهەرێما کوردستانێ، ژ بەرهەمێ وێ شۆڕەشێ یە؛ و ئەڤ ئازادییا ئەم نۆکە تێدا ژ بەرهەمێ رەنج و خۆڕاگرییا خەلکێ کوردستانێ و خوینا شەهیدێن بزاڤا رزگاریخوازا کوردستانی یە.