پەروەردە و پێشکەفتنا بەرەبابێن نوی

پەروەردە کلیلا پاشەرۆژێ یە. ل هەرێما کوردستانێ، دەستکەفتێن مەزن د بیاڤێ پەروەردێ دا هاتینە تۆمارکرن، کو ئەڤە بەلگەیە لسەر رژدییا حکومەتا هەرێما کوردستانێ بۆ باشترکرنا سیستەمێ پەروەردێ.

حکوومەتا هەرێمێ هەتا نها 226 قوتابخانەیێن نوو ئاڤاکرینه و 29 قوتابخانەیێن دی د قۆناغا بجهئینانێ دانە. ل گەل ڤێ چەندێ، 2114 قوتابخانە هاتینە نووژەنکرن و 629 پۆلێن نوو یێن خواندنێ هاتینە زێدەکرن. ئێک ژ دەستکەفتێن هەرە گرنگ ژی ڤەگەراندنا 33 هزار زارۆکێن سەر جادەیان بوویە بۆ ناڤ پرۆسەیا خواندنێ. هەروەسا، 2 زانکۆیێن نوو هاتینە دامەزراندن و ب دەهان پشکێن نوو یێن زانستی هاتینە ڤەکرن.

بەلێ، پەروەردە بتنێ ئاڤاکرنا ئاڤاهیان نینە. پەروەردە ب رامانا دروستکرنا سیستەمەکێ باشترە کو تێدا زارۆک فێری شارەزایی، هزرکرن، پێشكەفتن و داهێنانێ ببن. پێدڤییە قوتابخانەیێن مە نە بتنێ جهێ خواندنێ بن، بەلکو ببنە سەنتەرێن پەروەردەکرنا کەسایەتی، بهێزکرنا هزرێ و ئاڤاکرنا مرۆڤێن سەرکەفتی.

حکوومەتا هەرێما کوردستانێ پێنگاڤێن جددی بۆ بلندکرنا کوالیتییا خواندنێ هاڤێتینە، لێ هەتا بگەهیتە ئارمانجێن خۆ، پێدڤی ب ژێرخانەکا پەروەردەیی یا بهێز هەیە، دا کو د ڤان ئاڤاهیان دا مرۆڤێن پربەرهەم و مفادار بۆ گەلێ کوردستانێ بهێنە پێگه‌هاندن.

پەروەردە بتنێ بۆ زارۆکان نینە. پێدڤی یە بەرنامەیێن فێرکاری یێن بەردەوام بۆ مەزنان ژی بهێنە رێکخستن، ب تایبەتی بۆ وان کەسێن کو د دەمێ خۆ دا ژ خواندنێ بێبار بووینە، و هەروەسا بۆ خودان پێدڤیێن تایبەت کو رێژەکا بەرچاڤ ژ جڤاکی پێکدئینن. پەروەردە بۆ هەر کەسەکێ پێدڤی ب شارەزاییەکا نوو هەبیت گرنگە.

پەروەردە بنگەهێ سەرەکی یێ ئاڤاکرنا وەلاتانە. د سالێن بۆری دا، حکوومەتا هەرێما کوردستانێ ریفۆرمەکا باش د سیستەمێ پەروەردێ دا ئەنجام دایە، لێ ژ بەر کو پەروەردە پرۆسەیەکا درێژخایەنە، پێدڤی ب دەمەکێ پتر هەیە هەتا کو بەرهەمێ وێ ب شێوەیەکێ باشتر دیار ببیت.

ل دوماهیێ، پەروەردە سەرمایەگوزارییا راستەقینە یە بۆ پاشەرۆژا مە. هەر جڤاکەکێ گرنگیێ ب پەروەردێ بدەت، ئەو جڤاکە دشێت گەشێ بکەت و پێشبکەڤیت. لەورا، بلا ئەم هەمی پێکڤە پشتەڤانیێ ل پەروەردێ بکەین و هەول بدەین جڤاکەکێ خواندەڤان و زانا ئاڤا بکەین.