سەرکەوتنی گەورەی پارتی و فراوانکردنی خزمەتگوزارییەکان لە کوردستانەوە بۆ عێراق

لە هەڵبژاردنەکانی پەرلەمانی عێراقدا، پارتی دیموکراتی کوردستان توانیی سەرکەوتنێکی مێژوویی بەدەستبهێنێت، کە نەک هەر کاریگەریی قووڵی لەسەر داهاتووی سیاسیی هەرێمی کوردستان دەبێت، بەڵکو کاریگەریی بەرچاوی لەسەر گۆڕانکارییەکانی عێراق بە گشتی دەبێت، ئەم سەرکەوتنە ئەنجامی کارکردنێکی پلان بۆ داڕێژراو و ستراتیجییەکی بەهێز بوو، کە لە دروشمەکانی سەر کارتەکانی بانگەشەوە دەستیپێکرد و بە ئامانجی ملیۆن دەنگ کۆتایی هات.

دروشمی هاوبەشی، هاوسەنگی و سازان: بناغەی ستراتیجییەتی سەرکەوتن

لە سەرەتای هەڵمەتی بانگەشەی هەڵبژاردنەوە، پارتی دیموکراتی کوردستان دروشمەکانی هاوبەشی، هاوسەنگی، سازانی وەک ناوەرۆکی سەرەکیی پڕۆژەی سیاسیی خۆی خستەڕوو، ئەم دروشمانە تەنها وشە نەبوون، بەڵکو گوزارشت بوون لە دیدێکی گشتگیر بۆ چارەسەرکردنی کێشەکانی عێراق و بەدیهێنانی سەقامگیری، هاوبەشی لە بڕیاردان، هاوسەنگی لە دەسەڵاتەکان و سازان لەسەر کێشە هەڵپەسێردراوەکان، بناغەی ئەو پڕۆژەیە بوون کە پارتی دەیەویست لە بەغدا جێبەجێی بکات.

چالێنجی ملیۆن دەنگ و وەڵامە گەورەکەی کوردستانیان

لەم نێوەندەدا، بەڕێز نێچیرڤان بارزانی، سەرۆکی هەرێمی کوردستان، چالێنجی بەدەستهێنانی ملیۆن دەنگی وەک ئامانجێکی سەرەکی بۆ پارتی ڕاگەیاند، ئەم چالێنجە تەنها ئامانجێکی ژمارەیی نەبوو، بەڵکو گوزارشت بوو لە متمانە بە توانای پارتی و هیوایەکی گەورە بۆ نوێنەرایەتیکردنێکی بەهێزی گەلی کوردستان لە بەغدا، وەڵامی گەلی کوردستان بۆ ئەم چالێنجە زۆر لەسەرتر بوو، چونکە پارتی توانی نەک هەر ملیۆن دەنگ بەدەستبهێنێت، بەڵکو ژمارەیەکی زیاتری دەنگەکانیش مسۆگەر بکات.

سەرەڕای گەورەیی هەڵمەتی بانگەشە و ڕکابەرییە توندەکان، پرۆسەی هەڵبژاردن بە شێوەیەکی زۆر ئارام و بێ کێشە بەڕێوەچوو. ئەمەش نیشانەی پێگەیشتنی سیاسی و پابەندبوونی لایەنەکان بوو بە پرۆسەی دیموکراسی، کە دواجار لە بەرژەوەندیی گەلی کوردستان و عێراقدا بوو.

دیدگای سەرۆک بارزانی: بەهێزبوون لە بەغدا و خزمەتکردنی هەموو عێراق

لە درێژەی هەڵمەتەکانی بانگەشەی هەڵبژاردندا، سەرۆک مەسعود بارزانی بە بەردەوامی جەختی لەسەر چەند خاڵێکی گرنگ دەکردەوە، سەرۆک بارزانی دووپاتی دەکردەوە کە ئەمجارەیان پارتی دەیەوێت لە بەغدا بەهێز بێت و لەوێوە کار بۆ چەسپاندن و جێبەجێکردنی دەستوور بکات، ئەمە تەنها مانای پاراستنی مافەکانی گەلی کوردستان نەبوو، بەڵکو مانای پابەندبوون بوو بە بنەماکانی دەوڵەتێکی فیدراڵی و دیموکراسی بۆ هەموو عێراق.

یەکێکی تر لە خاڵە هەرە گرنگەکان کە سەرۆک بارزانی دووپاتی دەکردەوە، فراوانکردنی خزمەتەکانی پارتی و حکومەتی هەرێمی کوردستان بوو بۆ تەواوی عێراق، سەرۆک بارزانی ڕایگەیاند کە جگە لە کوردستان، پارتی خزمەتی تەواوی عێراق دەکات، ئەم دیدگایە فراوان و گشتگیرە، نیشانەی ئەوەیە کە پارتی خۆی بە خاوەنی پڕۆژەی نیشتمانیی عێراقی دەزانێت و سنووری خزمەتەکانی تەنها بە سنوورە جوگرافییەکانی کوردستانەوە نابەستێتەوە.

ئایندەیەکی پڕ هیوا بۆ عێراق

ئەم سەرکەوتنەی پارتی و دیدگای سەرۆک بارزانی بۆ فراوانکردنی خزمەتگوزارییەکان بۆ هەموو عێراق، هیوا و ئومێدێکی گەورە دروست دەکات بۆ چارەسەرکردنی کێشەکان و بنیاتنانی عێراقێکی ئارام و سەقامگیر، لە کاتێکدا پارتی دەیەوێت لە بەغدا بەهێز بێت و بە کردار دروشمەکانی هاوبەشی، هاوسەنگی، سازان جێبەجێ بکات، گەلانی عێراق چاوەڕوانی ئایندەیەکی گەش دەکەن.