گەورەترین کونسوڵخانە لە پایتەختی کوردستاندا پەیامێکی ستراتیژی و ئایندەیەکی گەش

کردنەوەی گەورەترین کونسوڵخانەی ئەمریکا لەسەر ئاستی جیهان لە هەولێری پایتەختی هەرێمی کوردستان، کە ڕووبەرەکەی نزیکەی 200 هەزار مەتر دووجا (20 هەکتار) دەبێت، تەنها پرۆژەیەکی تەلارسازی نییە، بەڵکو هەنگاوێکی دیپلۆماسی و ستراتیژیی یەکجار گرنگە.

ئەم پڕۆژەیە کە ئێستا لە قۆناغی جێبەجێکردندایە، ئاماژەیەکی ڕوونە بۆ سەقامگیریی هەرێمی کوردستان و ئەو گۆڕانکارییە ئەرێنییانەی کە ناوچەکە بەخۆیەوە دەبینێت. ئەمڕۆ هەرێم وەک ناوەندێکی دیپلۆماسیی بەهێز و جێی متمانە لە ڕۆژهەڵاتی ناوەڕاستدا سەیر دەکرێت، ئەمەش جەختکردنەوەیە لەسەر پێگەی هەرێم وەک خاڵێکی جێگیر بۆ پاراستنی بەرژەوەندییەکانی ویلایەتە یەکگرتووەکانی ئەمریکا.

بڕیاری دروستکردنی ئەم "قەڵا دیپلۆماسییە" لە هەولێر، دەرەنجامی ئەو متمانە قووڵەیە کە بە سەقامگیریی هەرێم هەیە. ئەم متمانەیە لەو ئەزموونە تاڵەوە سەرچاوەی گرتووە کە لە ڕابردوودا لە بەغدای پایتەختی عێراق بینرا، کاتێک گیانی دیپلۆماتکارانی ئەمریکا لەژێر هەڕەشەی بەردەوامی گرووپە چەکدارەکاندا بوو. لەبەرامبەر ئەو بۆشاییە ئەمنییەی عێراقی فیدراڵ، دۆزینەوەی پێگەیەکی پارێزراو بۆ پاراستنی دیپلۆماتکار و بەرژەوەندییەکانی ئەمریکا بووە پێویستییەکی حاشاڵێنەگر.

لەم سۆنگەیەوە، هەڵبژاردنی هەولێر لەلایەن واشنتۆنەوە، پەیامێکی ڕوونە کە هەرێمی کوردستان تاکە هاوبەشی جێی متمانەیە بۆ درێژەدان بە ئەرکە دیپلۆماسی و ئەمنییەکانیان لە ناوچەکەدا.

لەسەر ئاستی ئابووریش، ئەم کونسوڵخانە نوێیە وەک دەروازەیەکی گەورەی وەبەرهێنان ڕۆڵ دەبینێت. بوونی گەورەترین نوێنەرایەتیی ئەمریکا، هاندەرێکی بەهێز دەبێت بۆ کۆمپانیا جیهانییەکان تاوەکو ڕوو لە هەرێم بکەن و سەرمایەکانیان لە بازاڕەکانی کوردستاندا بخەنە گەڕ. ئەمەش هەرێم دەکاتە وێستگەیەکی بازرگانیی سەرەکی و پردێکی پەیوەندیی ئابووریی پتەو.

لەکۆتاییدا، کونسوڵخانەی ئەمریکا لە هەولێر تەنها باڵەخانەیەکی دیپلۆماسی نییە، بەڵکو وەبەرهێنانێکی مەزنە لە ئایندەی سیاسی و ئابووریی هەرێمەکەمان. ئەگەرچی قەوارەی هەرێمی کوردستان لە دڵ و دەروونی تاک بە تاکی ئێمەدا پارێزراوە، بەڵام ئەم هەنگاوە نێودەوڵەتییە، پارێزبەندییەکی فەرمی و یاسایی بەهێزتری پێ دەبەخشێت. ئەمەش ئاسۆیەکمان پێشان دەدات کە پڕە لە هاوبەشیی ستراتیژی و بەرژەوەندیی هاوبەش بۆ هەردوولا.