جاسم سەبری
نووسەر
کرمێ دارێ و تاکێ کورد دناڤبەرا مێژوو و رۆژەڤێدا
طابورێ پێنجێ یان ئەم ب کوردی بێژن کرمێ دارێ، زاراڤەکێ سیاسی و سەربازییە و ب مەبەستا ژناڤبرنا ناڤخۆیی یان سیخوڕی و خیانەتێ دهێتە بکارئینان.
ئەڤ زاراڤە ڤەدگەرت بۆ شەڕێ ناڤخۆ یێ ئسپانیا دەمێ ژەنەراڵ " ئەمێلیۆ موولا " ئێک ژ سەرکردێن هێزێن نەتەوەیی بەرەڤ مەدریدا پایتەخت دچوو ب چوار طابور یان بێژنی چوار لیوایێن سەربازی، رۆژنامەڤانان پرسیار ژێ کر مەدرید دێ ب کیژ طابورێ هێتە وەرگرتن، وی دەمێ جەنەڕالی گۆت، مە طابورەکێ پێنجێ ژی هەیە د ناڤا دلێ مەدریدێ دا کو بێدەنگی کار بۆ مە دکەت، مەبەستا وى ئەو ئالیگر و سیخوڕ بوون یێن کو ئۆپۆزسیۆنێ د ناڤا باژێری دا هەیین.
ئەڤی زاراڤی ئێدی پێناسەکا جیهانی وەرگرت و دنها دا ئەڤ گوتنە بو وان کەسا دهێت ئاوێن د ناڤا وەلات یان ڕێکخراوەکێ دا بێدەنگ کار دکەن بۆ لاوازکرنا وێ دناڤخوەیی دا و ئێدی ئەڤ زاراڤە بو زاراڤەکێ جیهانی و جهێ خوە دناڤا جیهانێ داکر بۆ بابەتەکێ سیاسی و هەوالگیری و سەربازی هاتە بکارئینان .
د مێژووا کوردان دا، ژ بەرکو ژینگهها ئالۆز یا جیۆپۆلیتیک دناڤا کوردان دا هەبوو، زاراڤێ "طابورێ پێنجێ " کرمێ دارێ کاریگەرییا خۆ یا وێرانکەر ل سەر گەلێ کورد هەبوویە.
گەلەک مێژوونڤێسان ئاماژە ب وێ چەندێ دایە کو بەشەکێ مەزن ژ شکەستێن مێژوویی ب تەمامی ژبەر هێزا دوژمنێن دەرەکی نەبوویە، بەلکو ژ بەر هەبوونا لایەن یان وانکەسان بوویە ئەڤێن د ناڤا مالا کوردی دا رۆلێ کرێمێ دارێ گێراینە.
دەمێ ئەم مێژووا کوردان دخوێنین ب تایبەت د سەردەمێن وەرچەرخانێ دا، چەند نموونەیێن دیار یێن ڤی رۆلی دهێنە پێشچاڤ هەر ژ بزاڤ و میرگەهێن کوردی تا شورەشا شێخ سەعیدێ پیران و کومارا کوردستان ل مەهاباد .
چەندین ئەگەر هەنە دبنە هاریکار کرمێ دارێ د مێژووا کوردان دا ڕولەکێ بەرچاڤ بگێرت :
ــ دابەشبوونا عەشایەری و ناوچەیی: نەبوونا یەکگرتنەکا نەتەوەیی یا بهێز، ئاسانکاری بو وەلاتێن داگیرکەر دکرن دژایەتیێ دناڤبەرا هوز و عەشیرێن کوردان دا پەیدابکەن.
ــ شەڕێ دەروونی: ئەندامێن طابورێ پێنجێ هەردەم هەولددان بێهێزی و نەبوونا دەرفەتێ بەلاڤ بکن وەکو گوتنێن " ئەم نەشێن دژی ڤان دەولەتێن مەزن شەری بکەن یان دژایەتیا فلان داگیرکەری دژی دینییە".
ــ مفایێ کەسۆکی و دارایی: حەزا دەولەمەندبوونێ و دەستهەلاتداریێ و گەهشتنا کورسیکێ دناڤبەرا ئەندامێن مالباتێن میرێن کوردان دا ل هەمبەری ژدەستدانا ئارمانجێن کوردان .
ئەگەر ئەم ب هویرکاتی بەحس ل مێژوویێ بکەین مە لاپەرێن ڕەش دگەل ئەڤی بابەتی هەنە و تا نها ئەڤ بابەتە مورکەکا دیارە ب ئەنیا پاشەروژا گەلێ کورد ڤە .
ئەگەر ئەم بەحس ل شەرێ داعشێ بکەین ئەم دێ بینن چ ب مەبەست یان بێ مەبەست چەندین روژنامەڤان و دەزگەهێن مەدیایی بوونە هاریکار بۆ رێکخراوا تێرورستی یا داعش لسەر داگیرکرنا ناوچێن کوردی برێکا بەلاڤکرنا ترسێ و دوودلیێ و گەهاندنا زانیاریان ب دۆژمنی، زێدەباری پالپشتی و پشتەڤانا چەندین مەلا و کەسایەتیێن ئاینی بوڤێ رێکخراوێ و هاندانا گەنجان بۆ جیهادێ و کافرکرنا دەستهەلاتدارێن کورد .
ژبەرکو مە رێژەکا زۆر یا رێکخراو و گرووپ و دەزگەهێن مەدەنی و روپەل و دەزگەهێن مەدیایی یێن سوشیالێ یێن بێ ناسنامە هەنە و بەردەوام ئەڤ دەزگەهێن بێ ناسنامە هەولا ژناڤبرنا بیروباوەرێن تاکێ کورد ددەن برێکا بەلاڤکرنا بابەت و دەنگوباسێن بێ بنەما و بابەتێن کو چ راستی بو نینن، چ گومان نینن کو ئەڤ لایەنە بێ پالپشتی و بێ پلان ئەڤی کاری ئەنجام نادەن .
وەکی روژێ دیارە کا چەند کەنال و دەزگەهێن کوردی برێکا درامایێن تورکی و بیانی چەوا هەولا ژناڤبرنا نەریت و فولکلور و عەدەتێن کوردی دکەن و نەریتێن بیانی لدەف کوردان شرین دکن وەسا ددەنە دیارکرن کو نەریتێن مە جهێ شەهرمەزاریێ نە و ئەڤائەم تێدا نەزانینە.
رۆژانە ئەم دبینن چەوا کەسایەتیا سیاسیێ کورد برێکا بەرنامە و بابەتێن فەیک دهێتە شکاندن و بێ بهاکرن، برێکا بەلاڤکرنا گوتار و لێدوانێن نەرێنی ئەم دبینن جەوا روژانە دیوارێ باوەریێ دناڤبەرا تاکێ کورد و حکۆمەتا هەرێمێ دا دهێتە هەرفاندن .
ئێدی ڕول گێران بو لاوازکرن دەستهەلاتا هەرێمێ بوویە دیاردە و جهێ شانازیێ، ژبەر کو روژانە ئەم چەندین کارەکتەران ژ پەرلەمانتار و کەسایەتیێن سیاسی یێن کورد دبینن کو بەردەوام ل بەغدا هەولا لاوازکرنا هەرێمێ دکەن و لژێر پەردا بەرهەلستکاریێ بەردەوام دژی بەرژەوەندیێن هەرێمێ کاردکن .
کوردان ژ خوە نەگوتییە " کرمێ دارێ نە ژ دارێ بت دار نارزیت".
ئەم وەکو مللەتێ کورد پێدڤی ب هوشیارکرنەکا توندن بو هندێ ئەم نەبینە کەرەستە و ئامراز بۆ خزمەتکرن ب دۆژمنان ژبەر کو چەندین جاران بێ ئاگاهی ئەم دکەڤن دچارچوڤێ ئەوێ پلانێ دا یا دوژمنان دارشتی .
ئەڤ بابەتە پێدڤی ب ڤەکولینێن زانستی و سیاسی هەیە و یا فەرە دەزگەهێن پەروەردەیی و رەوشەنبیری و میمبەرێن ئاینی رۆلێ خوە بگێرن بۆ هندێ کاریگەریا ئەڤی زاراڤی لسەر مە وەکو مللەتێ کورد لاواز بکەن و مە ژ نەزانینا خزمەتکرن ب دۆژمنان هۆشیار بکەن .