سەرەدانا سەرۆکوەزیران مەسرور بارزانی بۆ دهۆک و زاخۆ.. ئاراستەیەکێ نوی ژ بۆ ژێرخانا ئابووری

مەسرور بارزانی، سەروکێ حکوومەتا هەرێما کوردستانێ سەرەدانەکا چەند رۆژی بۆ پارێزگەها دهۆک و ئیدارا سەربەخوییا زاخۆ ئەنجامدا، دڤێ سەرەدانێدا چەندین هەڤدیتن دگەل تەخ و چینێن جودایێن جڤاکی هەبوون.

بێگۆمان ئەڤ سەرەدانە ژی وەکی هەمی سەرەدانێن دی یا بێ بەهر نەبوو ژ پرۆژەیێن خزمەتگۆزاری یێن پر بایەخ و جهێ گرنگیپێدان و ستراتیژی، بۆ نموونە؛ دانانا بەرێبنیاتی بۆ کارگەها پیشەسازیی یا ترۆمبێلان و ڤەکرنا پرۆژێ لقێ سەرەکێ یێ ترومبێلێن نیسان و راهێنانا کارمەندان،  ڤەکرنا پرۆژێ "تۆگا پۆرتو مارینا” و دانانا بەرێ بنیاتی بۆ پرۆژێ گەلیێ زاخۆ یێ گەشتیاری کو نێزیکی کۆژمێ 800 ملیۆن دۆلاران بۆ پرۆژێن زاخۆ هاتینە تەرخانکرن ئەڤە ژبلی پەیداکرنا سەدان دەلیڤێن کاری بۆ گەنجان، بنیاتەکێ موکمە بۆ ژێرخانا ئابووری و ستراتیژیەتا حکوومەتا هەرێما کوردستانێ. 

راگەهاندنا نەمانا بێکاریێ ل ناحیا باتێلێ وەکو ئێکەم ناحیە ل سەر ئاستێ عیراقێ و دەڤەرێ دەرخەرێ وێ راستیێ یە کو ستراتیژیەتا حکوومەتا هەرێما کوردستانێ و دانانا ژێرخانێ یا راست و دروستە، دهەمان دەمدا ل پارێزگەها دهۆکێ ژبلی جێبەجێکرنا پتر ژ هزار پرۆژان، رێکا جووتسایدێ باعەدرێ - شێخان هاتە ڤەکرن.

ژ وان نموونێن پرۆژێن ستراتیژی ل دهۆکێ دقۆناخا بجهئینانێدا، مەزنترین پارک ل سەر ئاستێ عیراقێ، مەزنترین پرۆژێ ئاڤێ ل قەزا بەردەرەش و دەوروبەرا و دیسان پرۆژێ رێکا سەرەکی یا دهۆک - شێخان - هەولێر کو ژ دەرگەهێ سنووری هەتا پایتەختی ئێدی رێک دێ بیتە جووتساید.

دیارکرنا ڤان نموونە و پرۆژان بۆ هندێیە ئەم دگەشبین بین و ئەم دشێین بێژین قۆناخێن باشێن خزمەتگۆزاری و ئاڤەدانیێ هاتینە بڕین. سەرەرای تەحەدیاتێن زۆر ژ وان ژی نەهنارتنا بودجێ بۆ ماوێ دوازدە سالان ژلایێ حکوومەتا فیدرالی ڤە بخو دەستکەفتەکێ دی یە.

 سەرەرای ڤێ چەندێ میتودا گۆهدانا هاوولاتیان ژ نێزیک و گەهاندنا گلەوگازندان ژلایێ تەخ و چینێن جوداڤە، بۆ حکوومرانیەکا باش یا پەسەندە، لێ دیسان حکوومەت دشێت باشتر بیت دڤان بوچوونێن ل خوارێدا:

- گرنگیدان ب خاندنا پیشەیی و فێرکرنا گەنج و لاوێن کوردستانێ دبیاڤێن جودا جودا دا بۆ دەستێ کاری پێدڤی ب وەلاتێن بیانی نەبین. 

- ⁠دانانا کارگەهان ل دویڤ پێدڤیا بازارێ دەڤەرێ و هەمەجورییا بەرهەمی بیت ئەڤە مارکتینکا نافخویی یا ب رێکا ڤیستەڤالێن بەرهەمێن خۆمالی دهێتە ئەنجامدان بۆ ئاراستەیا دەرڤە بهێتە گۆهارتن ئەڤە ژی ب دروستکرنا ژێرخانا گەشتیاری و بەرهەمێن ناڤخۆیی هاوتەریب دروست دبیت.

- ⁠مفا وەرگرتن ژ بکارئینانا تەکنۆلۆژییا بیانی درێکا ئاراستەکرنا تاکێن وەلاتی بۆ داهێنانێ و خزمەتگوزاریێن گشتی کو هژمارەکا وەلاتێن جیهانێ دڤان بیاڤاندا نموونە وەکی وەلاتێ چینێ سەرەرای هەبوونا پەیوەندیێن باش لێ پێدڤی ب بەرفرەهکرنا ئەزموونا وانین دناڤ هەرێما کوردستانێدا. 

ب گشتی، دانانا ژێرخانا ئابووری و ستراتیژیەتان ب گۆتارەکێ ناهێتە بەحسکرن لێ وەکی دەرئەنجام ئەڤ سەرەدانێن هەڤپشکێن پرۆژێن خزمەتگۆزاری و کۆمبوونێن راستەوخۆ یێن تەخ و چینێم جۆدا ئاراستەیەکا نوییە بۆ حوکمرانیێ و کارکرنێ و دەلیڤەیەکا باشە سەرەرای زۆریا ئاستەنگان بۆ بهێزکرنا ژێرخانا ئابورییا کوردستانێ.