گێنەڵ ئینێرجی: هەناردەکردنی نەوتی کوردستان دەستپێدەکاتەوە

K24- هەولێر

کۆمپانیای گێنەڵ ئینێرجی رایگەیاند پێشبینیی دەکات لە دوو رۆژی داهاتوودا هەناردەکردنی نەوتی کوردستان بە رێگەی بۆڕیی گواستنەوەی نەوت کوردستان-جەیهان دەستپێبکاتەوە.

موراد ئۆزگویل، سەرۆکی کارگێڕیی گێنەڵ ئینێرجی، کە لە کێڵگەی نەوتی تەق تەق لە هەرێمی کوردستان وەبەرهێنان دەکات، راشیگەیاند: "پێشبینیی دەکرێت لە دوو رۆژی داهاتوودا هەناردەکردنی نەوت لە نێوان باکووری عێراق و تورکیا دەستپێبکاتەوە".

موراد ئۆزگویل گوتیشی: "حکوومەتی تورکیا رێوشوێنی ئەمنیی بۆ پاراستنی بۆڕییەکە توند کردووە و چاوەڕوان دەکرێت ئەم گۆڕانکارییانە وەستانی کارکردنی بۆڕییەکە لە ئەم ساڵدا کەمتر بکەنەوە".

ئەمە لە کاتێکدایە بەهۆی تەقینەوەی بۆڕیی گواستنەوەی نەوتی کوردستان-جەیهان لە 17/2/2016وە لە ناوچەی شرناخ لە باکووری کوردستان هەناردەکردنی نەوتی هەرێمی کوردستان و کەرکووک بە رێگەی بۆڕییەکە وەستاوە.

کۆمپانیای گێنەڵ ئینێرجی یەکێکە لە دوو کۆمپانیای سەرەکیی کە لە کەرتی نەوتی هەرێمی کوردستان کار دەکەن.

پێشتر وەزارەتی سامانە سروشتییەكانی ھەرێمی كوردستان رایگەیاند: "بەھۆی ھێرشكردنە سەر بۆڕییە نەوتییەكانی نێوان ھەرێمی كوردستان و توركیا ھەناردەكردنی نەوت وەستا".

وەزارەتی سامانە سروشتییەكان گوتیشی: "لە نزیك شاری ئورفە لە باكووری كوردستان ھێرشكراوەتە سەر بۆڕییە نەوتییەكانی ھەرێمی كوردستان و بەھۆی ئەو ھێرشانەوە ھەناردەی نەوت لە 16 ئەم مانگەوە (شوبات/فەبرایەر) وەستێنراوە".

وەزارەتی سامانە سروشتییەكانی حكوومەتی ھەرێمی كوردستان لە مانگی یەکی ساڵی 2016 راپۆرتی پەیوەست بە قەبارەی ھاناردەكردنی نەوتی ھەرێمی كوردستانی بڵاوكردەوە و ئاشکرای کرد کە: "لە مانگی یەکی ئەم ساڵ 18 ملیۆن بەرمیل نەوتی لە رێی بەنەدەری جەیھانی توركیا ھەناردە كردووە".

بەڵام نێچیرڤان بارزانی، سەرۆکی حکوومەتی هەرێمی کوردستان رایگەیاند: ناتوانم هیچ لایەنێک بە تەقاندنەوەی بۆڕیی گواستنەوەی نەوتی کوردستان تۆمەتبار بکەم.

ئا: ئا ، ف