فڕۆکەیەکی میسریی بە سەر نشینەکانییەوە رفێندرا

K24-هەولێر

چەند سەرچاوەیەکی فڕۆکەوانیی مەدەنیی و پۆلیس رایگەیاند، ئەمڕۆ سێشەممە، فڕۆکەیەکی سەر بە کۆمپانیای میسر بۆ فڕۆکەوانیی کە گەشتێکی لە شاری ئەسکەندەرییەوە بۆ قاهیرە ئەنجام دەدا لە لایەن چەند کەسێکی نەناسراو رفێندرا و ناچار کرا لە وڵاتی قوبرس بنیشێتەوە.

بەپێی پۆلیسی قوبرس و بەرپرسێک لە فڕۆکەخانەی قاهیرە لە میسر: "فڕۆکەکە سەر بە کۆمپانیای میسرە بۆ فڕۆکەوانیی و 55 سەرنشین لەخۆدەگرێ لەگەڵ تیمی فڕۆکەوان و خزمەتگوزارانی نێو فڕۆکەکە کە ژمارەیان 7 کەسە لە لایەن چەند کەسێکی نەناسراوەوە رفێندرا و ئەمڕۆ سێشەممە ناچار کرا لە فڕۆکەخانەی لارنکا لە قوبرس بنیشێتەوە".

پۆلیسی قوبرس راشیگەیاند: "رفێنەرەکان کاتژمێر 05:30 بە کاتی گرینیچ پەیوەندیان بە تاوەری چاودێریی (فڕۆکەخانەی لارنکاوە کرد) و کاتژمێر 05:50 بە کاتی گرینیچ رێگە درا فڕۆکەکە بنیشێتەوە و تا ئێستا رفێنەرەکان داواکارییەکانیان ئاشکرا نەکردووە و شانەیەکی قەیران نێردراوە بۆ فڕۆکەخانەکە".

هاوکات ئاژانسەکانی هەواڵ دەڵێن: یەکێک لە رفێنەرانی فڕۆکەکە گوتوویەتی پشتێنەیەکی بۆمبرێژکراوی پێیە.

 هەروەها سەرچاوە ئەمنییەکان لە فڕۆکەخانەی قاهیرە ئاشکرایان کردووە کە: فڕۆکەکە جۆری ئێرباس A320 ە.

سەرچاوە: SKY NEWS، ئا: ئا ، ف