نادال و مارای گه‌یشتنه‌ چاره‌گی كۆتایی مۆنتی كارلۆ

پاڵه‌وانییه‌تی تێنسی ماسته‌رزی 1000 خاڵی مۆنتی كارلۆ به‌رده‌وامی هه‌یه‌، كه‌ یارییه‌كانی له‌ شانشینی مۆناكۆ له‌سه‌ر یاریگه‌ گڵینه‌كان به‌ڕێوه‌ده‌چێت.

رافاییل نادالی ئیسپانی و پێنجه‌می پۆلێنی به‌ بردنه‌وه‌ی له‌ دۆمینیك تیمی نه‌مسایی خۆی گه‌یانده‌ قۆناخی چاره‌گی كۆتایی.

له‌ قۆناخی سێیه‌مدا نادال رووبه‌ڕووی دۆمینیك تیم بووه‌وه‌ و یارییه‌كه‌شی به‌ دوو سێتی بێ وه‌ڵام برده‌وه‌و ئه‌نجامی سێته‌كانیش 6-1 و 6-2 بوون.

له‌ قۆناخی چاره‌گی كۆتایی نادال رووبه‌ڕووی ستانیسلاس ڤاڤرێنكاری سویسری ده‌بێته‌وه‌ كه‌ توانی به‌ بردنه‌وه‌ له‌ جیل سیمۆنی فڕه‌نسی خۆی بگه‌یه‌نێته‌ چاره‌گی كۆتایی.

ڤاڤرێنكا یارییه‌كه‌ی به‌ دوو سێتی بێ وه‌ڵام به‌ ئه‌نجامه‌كانی 6-1 و 6-2 له‌ تێنسزانه‌ فڕه‌نسیه‌كه‌ برده‌وه‌.

هه‌ر له‌ قۆناخی سێیه‌می مۆنتی كارلۆدا ئاندی مارای به‌ریتانی و دووه‌می پۆلێنی جیهانی سه‌ركه‌وتنی تۆماركرد و گه‌یشته‌ چاره‌گی كۆتایی.

له‌م قۆناخه‌دا تێنسزانه‌ به‌ریتانیه‌كه‌ رووبه‌ڕووی بینوا بیری فڕه‌نسی بووه‌وه‌ و یارییه‌كه‌شی به‌ دوو سێت به‌رامبه‌ر سێتێك برده‌وه‌، به‌ ئه‌نجامه‌كانی 2-6 و 7-5 و 7-5.

له‌ قۆناخی داهاتووشدا مارای رووبه‌ڕووی میلۆس راونیچی كه‌نه‌دی ده‌بێته‌وه‌ و ده‌یه‌می پۆلێنی ده‌بێته‌وه‌ كه‌ توانی به‌ دوو سێت به‌رامبه‌ر سێتێك له‌ دانیێل زومهه‌ری بۆسنه‌یی بباته‌وه‌.