پۆلیسی به‌ریتانیا به‌هۆی "الله اكبر" داوای لێبوردن ده‌كات

K24 - هه‌ولێر:

پۆلیسی شاری مانشسته‌ری به‌ریتانیا، به‌هۆی به‌كارهێنانی ده‌سته‌واژه‌ی "الله اكبر"، له‌ كاتی مه‌شق و راهێنانی ده‌زگای دژه‌ تیرۆر، له‌ یه‌كێك مۆڵه‌كان، داوای لێبوردن ده‌كات.

گاری شیوان، یاريده‌ده‌ری سه‌رۆكی پۆلیسی مانشسته‌ری گوتی: "سیناریۆی ئه‌و مه‌شقه‌، هاوشێوه‌ی ئه‌و كرده‌وه‌ تیرۆریستییانه‌ بووه‌ كه‌ رێكخراوی داعش ئه‌نجامیداون".

هه‌روه‌ها  گوتی: "ئێمه‌ هه‌ستمان كرد به‌ كارهێنانی ئه‌و ده‌سته‌واژه‌یه‌ ده‌بێته‌ هۆی به‌ یه‌ك به‌ستنه‌وه‌ تیرۆر و ئیسلام، بۆیه‌ داوای لێبوردن ده‌كه‌ین".

به‌ گوێره‌ی ماڵپه‌ڕی هه‌واڵی "سكای نیوز"، پۆلیسی دژه‌ تیرۆری به‌ریتانیا، سه‌رپه‌رشتی ئه‌و مه‌شق و راهێنانه‌ی كردووه‌، مه‌به‌ستیش لێی به‌ره‌نگاربوونه‌وه‌ی هێرشی تیرۆریستییه‌ بۆ سه‌ر مۆڵ و شوێنه‌ بازرگانییه‌كان.

پۆلیسی شاری مانشسته‌ر رووینكرده‌وه‌، نزیكه‌ی 800 خۆبه‌خش به‌شدارییان له‌و راهێنانه‌دا كردووه‌ و له‌ ساڵی رابردووه‌وه‌ پلانی بۆ دانراوه‌، پێشتریش مه‌شق و راهێنانی له‌و جۆره‌، له‌ گلاسكۆ و ئێسكس ئه‌نجامدراون.

لاى خۆیه‌وه‌، تۆنی لۆید، شاره‌داری مانشسته‌ر، راهێنانه‌كه‌ی به‌ سه‌ركه‌وتوو وه‌سفكرد و گوتی: "ئه‌وه‌ی جێگه‌ی نیگه‌رانییه‌، بڕیاری به‌ڕێوه‌به‌رایه‌تی مه‌شق و راهێنانه‌كه‌یه‌، سه‌باره‌ت به‌ گوتنه‌وه‌ ده‌سته‌واژه‌ی الله اكبر، له‌لایه‌ن ئه‌و كه‌سه‌ی رۆڵی تیرۆریسته‌ خۆكوژه‌كه‌ ده‌بینێت".