نرخی نەوت 60 دۆلاری تێپەڕاند

K24 - ھەولێر

بۆ یەکەمجار دوای زیاتر لە ساڵێک، نرخی نەوت بۆ سەرووی 60 دۆلار بەرزبووەوە، هۆکاری سەرەکیشی بۆ کەمبوونەوەی خستنەڕوو لە لایەن بەرهەمهێنەرانی نەوت و گەشبینییەکانی بە گەشانەوەی خواست دوای دابەشکردنی ڤاکسینی کۆرۆنا دەگەڕێتەوە.

نرخی نەوتی خاوی برێنت لە گرێبەستە داهاتووەکانی، بە رێژەی زیاتر لە 0.83% بۆ 60.06 دۆلار بۆ هەر بەرمیلێک بەرزبووەوە، نرخی بەرمیلێک نەوتی سووکی تێکساسیش بە رێژەی 0.91% بۆ 57.56 دۆلار بەرزبووەوە.

هاوکات ژمارەی ئەو کەشتییە نەوت هەڵگرانەی بەرەو چین ئاراستەی گرتووە، لە بەرزترین ئاستی شەش مانگی رابردوویدایە، کە ئەوەش ئاماژەیە بە بەهێزی خواست لە لایەن گەورەترین بەکاربەری نەوت لە جیهاندا.

هۆکاری سەرەکی بەرزبوونەوەی نرخی نەوت بۆ بڵاوکردنەوەی پێکووتەی کۆرۆنا لە تەواوی جیهاندا و گەشبینییەکان بۆ گەشانەوەی ئابووری جیهان دەگەڕێتەوە، هەروەها پەیمانی سعوودیە بە کەمکردنەوەی ملیۆنێک بەرمیل نەوت خۆبەخشانە لە هەردوو مانگی شوبات و ئادار، بازاڕەکانی گەشاندووەتەوە.