مەترسییەکانی هەڵاوسان و لاوازی دۆلار نرخی زێڕ بەرز دەكاتەوە

K24 - ھەولێر

بەهۆی پێشبینییەکان بۆ بەرزبووەنەوەی رێژەی هەڵاوسان و مەترسییەکان لەبارەی بەهای پشکەکان، جارێکی دیکە وەبەرهێنەران ناچارن روو لە پەناگە ئارامەکان بکەنەوە بەوەش نرخی زێڕ لە میانی مامەڵەکانیدا بەرزبووەوە.

نرخی زێڕ لە مامەڵە خێراکاندا بەرێژەی 1.5% بۆ سەرووی 1816 دۆلار بۆ هەر ئۆنسەیەک بەرزبووەوە، هەروها لە گرێبەستەکانی داهاتووی بۆ مانگی نیسان بەرێژەی زیاتر لە 1.7% بۆ سەرووی 1815 دۆلار بەرزبووەوە.

لە لایەکی دیکەوە دۆلار بۆ کەمترین ئاستەکانی چەند ساڵی رابردووی بەرامبەر پاوەندی بەریتانی و دراوە رکابەرەکانی دابەزی، هەروەها قازانجی قەواڵەکانی گەنجینەی ئەمەریکا بۆ بەرزترین ئاستی ساڵی رابردووی بەرزبووەوە، ئەوانەش دەرفەتی بۆ زێڕ واڵا کرد بۆ ئەوەی جارێکی دیکە وەک یەدەگ سوودی لێ وەربگیرێت.