خۆپیشاندان چه‌ند پارێزگایه‌كی دیكه‌ی عێراقی گرته‌وه‌

K24 - هه‌ولێر:

كه‌مێك به‌ر له‌ ئێستا، خۆپیشانده‌ران له‌ شاری ناسڕیه‌ی سه‌نته‌ری پارێزگای زیقار، هه‌ڵیانكوتایه‌ سه‌ر باڵه‌خانه‌ی ئه‌نجوومه‌نی پارێزگاكه‌. 

به‌ مه‌به‌ستی ده‌ربڕینی ناڕه‌زایی و بێزاری خۆیان له‌ ئه‌نجامنه‌دانی چاكسازی له‌ داموده‌زگاكانی حكوومه‌ت له‌و پارێزگایه‌، دانیشتووانی شاری ناسڕیه‌ی پارێزگای زیقار هه‌ڵیانكوتایه‌ سه‌ر باڵه‌خانه‌ی ئه‌نجوومه‌نی پارێزگا.

له‌ ئێستاشدا خۆپیشانده‌ران گردبوونه‌ته‌وه‌ و به‌ هوتافه‌كانییان داوای چاكسازی له‌ حكوومه‌ت ده‌كه‌ن.

هاوكات له‌گه‌ڵ زیقاڕ، خۆپیشاندان له‌ پارێزگای بابلیش ده‌ستپێكرد و خۆپیشانده‌ران داوای ئه‌نجامدانی چاكسازی ده‌كه‌ن و هوتاف له‌ دژی گه‌نده‌ڵی ده‌ڵێنه‌وه‌.

ئه‌مڕۆ دوای نیوه‌ڕۆ خۆپیشاندان و لایه‌نگرانی سه‌در، له‌ ناوچه‌ی سه‌وزی به‌غدا، هه‌ڵیانكوتایه‌ سه‌ر باڵه‌خانه‌ی ئه‌نجوومه‌نی وه‌زیران  و دواتر به‌ ته‌قه‌ی هێزه‌ ئه‌منییه‌كان و گازی فرمێسكرژێن، بڵاوه‌یان به‌ خۆپیشانده‌ران كرد.

به‌هۆی ته‌قه‌ی هێزه‌ ئه‌منییه‌كانیشه‌وه‌، نزیكه‌ی 3 كه‌س كوژران و 40 كه‌سی دیكه‌ش برینداربوون و ژماره‌یه‌ك خۆپیشانده‌ریش ده‌ستگیركران.

موقته‌دا سه‌در، رێبه‌ری ره‌وتی سه‌در، له‌ راگه‌یه‌ندراوێكدا، ته‌قه‌كردنی هێزه‌ ئه‌منییه‌كانی ئیدانه‌كرد و داوای ئازادكردنی خۆپیشانده‌رانیشی كرد.