ماکرۆن لە هەولێرە، لەگەڵ بەرپرسانی باڵای هەرێمی کوردستان کۆدەبێتەوە
K24 – هەولێر
ئیمانوێل ماکرۆن، سەرۆکی فەرەنسا لە هەولێرە و ئەمڕۆ لەگەڵ سەرۆک بارزانی و بەرپرسانی باڵای هەرێمی کوردستان کۆدەبێتەوە.
درەنگانی شەوی رابردوو ئیمانوێل ماکرۆن، گەیشتە هەرێمی کوردستان و لە فڕۆکەخانەی نێودەڵەتی هەولێر لەلایەن نێچیرڤان بارزانی، سەرۆکی هەرێمی کوردستان پێشوازی لێکرا. ئەمڕۆ ماکرۆن لەگەڵ سەرۆک بارزانی و سەرۆکی هەرێمی کوردستان و سەرۆکی حکومەت و سەرۆکی پەرلەمانی کوردستان دیداری دەبێت و رەوشی هەرێمی کوردستان و عێراق و ناوچەکە و پەیوەندییەکانی نێوان هەولێر و پاریس تاوتوێ دەکەن.
نێچیرڤان بارزانی، سەرۆکی هەرێمی کوردستان لە پەیجی تایبەتی خۆی لە تۆڕی کۆمەڵایەتی فەیسبووک نووسیویەتی: "خۆشحاڵم که له هه‌ولێر پێشوازیم له هاوڕێم و سەرۆکی فەرەنسا ئێمانوێل ماکرۆن کرد. لە میانەی سەردانەکەیدا بۆ کوردستان، گفتوگۆ ده‌رباره‌ی په‌یوه‌ندیی دووقۆڵی و هه‌ڵبژاردنه‌کانی عێراق و بابه‌تی دیکه‌ی جێی بایه‌خی هاوبه‌شمان دەکەین".
سەرۆکی هەرێم، راشیگەیاندووە: "سوپاسی به‌رده‌وامیی پشتگیریی فه‌ره‌نسا بۆ عێراق و هه‌رێمی کوردستان ده‌که‌م".
سەردانی سەرۆکی فەرەنسا بۆ هەولێر لە کاتێکدایە، بەگوتەی چاودێرانی سیاسی ناوچەکە بە قۆناغێکی هەستیاردا تێدەپەڕێت و عێراق بەرەو هەڵبژاردنی پێشوەختە دەچێت، کە بڕیارە لە مانگی ئۆکتۆبەری ئەمساڵ ئەنجامبدرێت، ماکرۆن رایگەیاند، وەک فەرەنسا پشتیوانی لە بەڕێوەچوونی هەڵبژاردنێکی پاک و بێگەرد دەکەن.
ئیمانوێل ماکرۆن، شەوی 27/8/2021 بە سەردانێکی فەرمی گەیشتە عێراق و دوێنێ بەشداری لە لوتکەی بەغدا کرد. لە چەند وتەیەکیشدا ماکرۆن پشتیوانی وڵاتەکەی بۆ عێراق دووپاتکردەوە و راشیگەیاند، دەبێ هەموو وڵاتانی هەرێمی و ناوچەکە هاوکار و هەمانگ بن، بۆ چەسپاندی سەقامگیری لە عێراق.