سه‌یدسادق دوای 33 رۆژ تامی سه‌ركه‌وتنی كرده‌وه
له خولی نایابی تۆپی پێی كوردستان، ئه‌مڕۆ چوارشه‌ممه دوو یاری به‌ڕێوه‌چوون، یانه‌ی برایه‌تی سه‌ركه‌وتنێكی گه‌وره‌ی تۆمار كرد و سه‌یدسادقیش تۆڵه‌ی شكسته‌كه‌ی هه‌فته‌ی رابردووی له یانه‌ی سۆرانی میوانی كرده‌وه.
شه‌قڵاوه ـ برایه‌تی
یانه‌ی شه‌قڵاوه دوای 3 یه‌كسانبوونی له‌سه‌ریه‌ك له خوله‌كه له نێو یاریگه‌ی خۆی تووشی شكست بوو، به ئه‌نجامی 4 گۆڵی بێوه‌ڵام به‌رامبه‌ر یانه‌ی برایه‌تی دۆڕا.
له خوله‌كی 19 عه‌بدوڵڵا خه‌لیل شریتی گۆڵه‌كانی برایه‌تی بڕی و به ئاسیستێكی دانا كامه‌ران یه‌كه‌مین گۆڵی له یارییه‌كه تۆمار كرد و نیوه‌ی یه‌كه‌م به‌م تاكه گۆڵه له به‌رژه‌وه‌ندی سه‌وزپۆشه‌كانی پایته‌خت كۆتایی هات.
دواتر له نیوه‌ی دووه‌م،عه‌بدوڵڵا خه‌لیل گه‌ڕایه‌وه و له خوله‌كی 75 به ئاسیستی شه‌مزین یاسین گۆڵی دووه‌میشی تۆمار كرد، دوای ته‌نیا دوو خوله‌ك به‌سه‌ر تێپه‌ڕبوونی ئه‌م گۆڵه، دانا كامه‌ران ئه‌ستێره دره‌وشاوه‌كه‌ی یارییه‌كه گۆڵی سێیه‌می بۆ برایه‌تی تۆمار كرد، هه‌مان یاریزان له كۆتاییه‌كانی یارییه‌كه به لێدانی پێناڵتی برایه‌تی كرده خاوه‌نی چواره‌مین گۆڵ، یارییه‌كه‌ش به 4 گۆڵی بێبه‌رامبه‌ر له به‌رژه‌وه‌ندی برایه‌تی كۆتایی هات.
یانه‌ی برایه‌تی له‌م وه‌رزه له كۆی 8 یاری، 3 بردنه‌وه، 4 به‌رامبه‌ربوون و 2 شكستی هه‌یه و به 13 خاڵ به‌شێوه‌یه‌كی كاتی بۆ خانه‌ی شه‌شه‌م ریزبه‌ندی سه‌ركه‌وت. له به‌رامبه‌ردا یانه‌ی شه‌قڵاوه تووشی پێنجه‌مین شكست بوو، به كۆكردنه‌وه‌ی 4 خاڵ له دوایین خانه‌ی ریزبه‌ندی دێت له دوای كشانه‌وه‌ی یانه‌ی هه‌ڵۆ.
سه‌یدسادق ـ سۆران
یانه‌ی سه‌یدسادق دوای 33 رۆژ گه‌ڕایه‌وه سه‌ركه‌وتن و به دوو گۆڵی بێوه‌ڵام له یانه‌ی سۆرانی میوانی برده‌وه.
یانه‌ی سه‌یدسادق له كۆتایی نیوه‌ی یه‌كه‌م له رێگه‌ی فه‌رمان عوسمان گۆڵی یه‌كه‌می یارییه‌كه‌ی تۆمار كرد، دواتر له نیوه‌ی دووه‌م نه‌شوان محه‌مه‌د گۆڵی دووه‌می بۆ سه‌یدسادق زیاد كرد و یارییه‌كه‌ش به 2 گۆڵی بێبه‌رامبه‌ر له به‌رژه‌وه‌ندی سه‌یدسادق كۆتایی هات.
یانه‌ی سۆرانیش تووشی سێیه‌مین شكست بوو، به 10 خاڵ به‌شێوه‌یه‌كی كاتی له شوێنی خۆی له خانه‌ی هه‌شته‌م مایه‌وه.